У Віцебску 1 снежня адбылася выязная калегія Міністэрства інфармацыі Рэспублікі Беларусь, у якой прынялі ўдзел Міністр Уладзімір Пярцоў. На мерапрыемстве з назвай «Аб'яднанне і стварэнне рэгіянальных холдынгаў», чыноўнікі сумесна з журналістамі і кіраўнікамі рэдакцый мясцовых газет вырашалі ў якім выглядзе пераўтварыць медыяпрастору для мясцовых СМІ, каб яны сталі эфектыўным і танным інструментам для дзяржпрапаганды.

Суддзя Віцебскага абласнога суда Наталля Рошчына 17 лістапада разглядзела апеляцыйную скаргу Аляксандра Шарабайкі на прысуд суддзя суда Глыбоцкага раёна Андрэя Тарасевіча па арт. 368 Крымінальнага кодэкса (Абраза прэзідэнта Рэспублікі Беларусь). Суддзя Рошчына пакаранне Аляксандру 1,5 гады пазбаўленне волі аставіла без змены, а скаргу без задавальнення.

З 18-ці пяцікласнікаў сярэдняй школы №18 будуць выхоўваць «законапаслухмяных грамадзян», піша БЕЛТА. Нібыта ў астатніх класах і школах знарок выхоўваюць правапарушальнікаў, а то і махляроў, злодзеяў, забойцаў. Таксама паведамляецца, што вучні «прававога класа» павінны выхоўвацца «юнымі патрыётамі». Пытанне тое самае: хіба ў іншых навучальных установах вучацца «юныя здраднікі Радзімы» . І яшчэ адно: чаму ў разуменні сучасных беларускіх ідэолагаў праявай патрыятызму лічыцца жаданне працаваць у міліцыі? Бо яшчэ адна мэта стварэння «прававога класа» - гэта «арганізацыя кадравага адбору ў органы ўнутраных спраў са школьнай парты».

У апошні дзень лістапада стала вядома пра затрыманні Анатоля Трубкіна і Інэссы Ворыхавай. 66-гадоваму Анатолю Трубкіну, бацьку Аляксея Трубкіна, які з 2006 года жыве ў Польшчы, 1 снежня прысудзілі арышт, не зважаючы на стан ягонага здароўя: ён інвалід па зроку, хварэе на дыябет, а нядаўна перанёс інсульт. Напярэдадні сілавікі правілі ператрус у ягонай кватэры, з 30 лістапада мужчына знаходзіцца за кратамі. Пра тое, у чым менавіта яго звінавацілі, звестак пакуль няма.