15 красавіка суддзя суду Першамайскага раёну Віцебску Наталля Карабліна адмовіла віцяблянцы Таццяне Івановай у задавальненні хадайніцтва ў адтэрміноўцы аплаты адміністрацыйнага штрафу. Штраф быў прызначаны суддзёй Карабліной за пікет, які правяла Іванова «шляхам вывешвання на лоджыі сваёй кватэры герба «Пагоня» на фоне бел-чырвона-белага сцяга».

Старшыня Віцебскай абласной Рады партыі БНФ Канстанцін Смолікаў паскардзіўся ў абласны выбаркам на тое, што на інтэрнэт-старонцы камісіі па выбарах ігнаруецца дзяржаўная беларуская мова. Ня маюць беларускамоўных вэрсіяў і іншыя старонкі на дзяржаўных інтэрнэт-рэсурсах, якія інфармуюць аб ходзе выбарчай кампаніі.

Гэтымі днямі ў адной з віцебскіх арт-прастораў адбыўся бясплатны кінапаказ фільму Pride (“Гонар”) і дыскусія на тэму ЛГБТ. Гэта была першая сустрэча з шэрагу імпрэзаў, якія мае ладзіць у Віцебску новая моладзевая ініцыятыва CLOSET FREE.

У Наваполацку адбыўся сэмінар “Становішча жанчын на рынку працы Беларусі”. У канфэрэнц-залі гатэля “Дружба” сабралася больш за дзясятак жанчын, якія ўдзельнічаюць у праграме жаночага лідэрства школы “Мова жанчын”.

Ужо трэці год жыхары Воршы змагаюцца за тое, каб абвесткі ў гарадзкім грамадзкім транспарце гучалі па-беларуску. Так некалі і было, пакуль зь невядомае прычыны назвы прыпынкаў не пераклалі на расейскую. Кіраўніцтва ААТ «Віцебскаблаўтатранс» адказала аршанскім актывістам, што ня бачыць падставаў вяртаць у транспарт родную мову.