Адбыўся суд над удзельнікамі “чарнобыльскага” пікету ў Віцебску
Па 20 базавых велічыняў штрафу прысудзілі віцебскім актывістам Яну Дзяржаўцаву і Віталю Каваленку. Іх абвінавацілі ў правядзеньні несанкцыянаванага пікету. 26 красавіка яны проста стаялі з плякатамі «Будаваць АЭС бяз згоды народу можа толькі вораг Беларусі» і «Дыктатар, пабудуеш Астравец — пажнеш Чарнобыль». Актывістаў судзіла Іна Грабоўская, вядомая ў Віцебску сваімі шматлікімі абвінаваўчымі пастановамі ў дачыненьні да апазіцыянэраў. Ян Дзяржаўцаў і Віталь Каваленка зьбіраюцца абскардзіць судовае рашэньне ў вышэйшых інстанцыях.
Школьнікаў Віцебшчыны рыхтуюць да вайны?
Трынаццатая абласная ваенна-спартовая гульня “Зарніца”, прысьвечаная 68-й гадавіне перамогі савецкага народу ў Вялікай Айчыннай вайне, стартуе 16 траўня ў Віцебску, паведамілі ў Віцебскім абласным камітэце ГА “Беларускі рэспубліканскі саюз моладзі”. Удзельнікамі спаборніцтваў стануць каля 25 каманд па 7 чалавек кожная, якія прадстаўляюць установы адукацыі рэгіёнаў вобласьці. Дзеці паспаборнічаюць у марш-кідку зь перашкодамі (даўжыня дыстанцыі 1500-2000 м). Камандам неабходна прайсьці некалькі этапаў: транспартоўка пацярпелага, стральба з пнэўматычнай вінтоўкі, пераправа, паласа перашкод, кіданьне гранаты, фарсіраваньне броду, усталёўка намёту, разборка і зборка аўтамату.
Парлямэнтары падзякавалі віцебскаму праваабаронцу
Старшыня пастаяннай камісіі па дзяржаўным будаўніцтве, мясцовым самакіраваньні і рэглямэнце Палаты прадстаўнікоў Нацыянальнага сходу Аляксандар Зазуля ад імя дэпутатаў – сябраў камісіі падзякаваў Леаніду Сьвеціку за праяўленую ім ініцыятыву і актыўную жыцьцёвую пазыцыю. У цяперашні час ідзе падрыхтоўка законапраекту «Аб унясеньні зьменаў у Выбарчы Кодэкс Рэспублікі Беларусь», і праваабаронца накіроўваў у парлямэнт прапанову аб тым, якія зьмены, на яго думку, варта зрабіць.
Супраць помніку Альгерду ў Віцебску ўдалося сабраць толькі 8 подпісаў
Восем праціўнікаў ўстаноўкі ў Віцебску помніку Вялікаму князю Літоўскаму і князю Віцебскаму Альгерду зьвярнуліся з адкрытым лістом да Аляксандра Лукашэнкі. Сярод чалабітчыкаў ёсьць нават ветэран «Аэрафлоту». Да кіраўніка дзяржавы аўтары ліста зьвяртаюцца як грамадзяне Рэспублікі Беларусь, зрэшты часта яны блытаюцца і называюць нашу краіну «Белоруссія».
У Віцебску адкрылася выстава, прысьвечаная навамучанікам і вызнаўцам
Выстава “Сьвятло сьвету” аб навамучаніках і вызнаўцах, ураджэнцах Віцебскай вобласьці, адкрылася 15 траўня ў храме Праабражэньня Гасподняга, паведамілі ў Віцебскай эпархіі Беларускай праваслаўнай царквы. Яна зладжаная ў Віцебску ў рамках XI Велікоднага фэсту. Выстава арганізаваная пры садзейнічаньні аддзелу рэлігійнай адукацыі і катэхізацыі Віцебскай эпархіі, а таксама цэнтру праваслаўнай асьветы прападобнай Эўфрасіньні Полацкай.
Віцебскія актывісты БХД зладзілі акцыю ў падтрымку сямейных каштоўнасьцяў
У Віцебску мясцовыя актывісты аргкамітэту па стварэньні партыі “Беларуская хрысьціянская дэмакратыя” напярэдадні Міжнароднага дня сям’і, які адзначаецца 15 траўня, правялі акцыю ў абарону сямейных каштоўнасьцяў. Ля віцебскай ратушы – месца адпачынку гараджанаў – яны раздавалі брашуры БХД “За сямейныя каштоўнасьці”. Як паведаміла каардынатарка аргкамітэту БХД Тацьцяна Севярынец, усяго было раздадзена каля сотні такіх брашураў.
Прызначаная дата суду за “парушэньне закону аб СМІ”
Старшыня абласной арганізацыі партыі БНФ Леанід Аўтухоў атрымаў позву ў Кастрычніцкі райсуд на 15 гадзін 17 траўня. Судзьдзя Алена Протас мае разгледзець міліцэйскі пратакол, складзены на актывіста “за парушэньне заканадаўства аб СМІ”.
Санстанцыя пераконвае палітыка ў тым, што ў Віцебскім ІЧУ сядзельцы знаходзяцца ў добрых умовах
Правёўшы пяць сутак у Віцебскім ізалятары часовага ўтрыманьня (ІЧУ) за раздачу ўлётак з запрашэньнем на акцыю 25 сакавіка, абласны кіраўнік партыі БНФ Леанід Аўтухоў вымушаны быў зьвярнуцца да лекараў. Паводле палітыка, у ІЧУ ён быў дастаўлены зусім здаровым, а як выйшаў стуль, лекары паставілі яму дыягназ «інфэкцыйная ангіна». На думку Леаніда Аўтухова, інфэкцыю ён, найхутчэй, падчапіў у ІЧУ, таму папрасіў санстанцыю праверыць на адпаведнасьць санітарным нормам умовы ўтрыманьня грамадзян у ізалятары.
Раённыя аддзелы Сьледчага камітэту ў Віцебску і Гомелі аб’ядноўваюцца ў гарадзкія
Раённыя аддзелы Сьледчага камітэту ў Віцебску і Гомелі аб’ядноўваюцца ў гарадзкія. Адпаведны ўказ № 217 “Аб удасканаленьні сыстэмы Сьледчага камітэту” кіраўнік дзяржавы Аляксандар Лукашэнка падпісаў 8 траўня, паведамілі ў прэсавай службе беларускага лідэра. “Дакумэнтам прадугледжанае аб’яднаньне раённых аддзелаў Сьледчага камітэту ў Віцебску і Гомелі ў адпаведныя гарадзкія аддзелы Сьледчага камітэту”, - праінфармавалі ў прэс-службе. З прыняцьцем гэтага ўказу завяршаецца рэарганізацыя тэрытарыяльных падразьдзяленьняў Сьледчага камітэту ў абласных цэнтрах і гарадох абласнога падпарадкаваньня.
Пракуратура выявіла парушэньні працоўнай дысцыпліны ў РУП “Віцебскаўтадар”
Парушэньні працоўнай дысцыпліны выяўленыя ў РУП “Віцебскаўтадар”, паведаміла пракурор аддзелу па наглядзе за выкананьнем заканадаўства і законнасьцю прававых актаў пракуратуры Віцебскай вобласьці Натальля Калпакова. Парушэньні на прадпрыемстве і яго структурных падразьдзяленьнях у рэгіёнах вобласьці былі выяўленыя пры правядзеньні праверкі выкананьня патрабаваньняў працоўнага заканадаўства, заканадаўства аб ахове працы, дырэктыў № 1 “Аб мерах па ўмацаваньні грамадзкай бясьпекі і дысцыпліны” і № 3 “Эканомія і ашчаднасьць - галоўныя фактары эканамічнай бясьпекі дзяржавы”, заканадаўства аб прафіляктыцы правапарушэньняў і аб захаванасьці ўласнасьці.