Жыхарам Бешанковічаў, дзе ў 2024г. запланава правядзенне абласных «Дажынак», варта запомніць амбітныя абяцанні мясцовых уладаў. Бо, як паказвае практыка, чым бліжэй святкаванне, тым меней грошай застаецца на выкананне абяцанага. Раённая газета «Зара» абяцае, што да свята хлебаробаў у Бешанковічах будзе пабудаваны басейн, зробяць капітальныя рамонты ў 13-ці шматкватэрных дамах і бягучыя – яшчэ ў 20-ці дамах. Праўда, да добраўпарадкавання пад’ездаў і прыдамавых тэрыторый плануюць прыцягваць жыхароў і іх уласныя фінансавыя сродкі.

Жонку віцебскага відэааператра-фрылансера вінавацяць за стварэнне экстрэмісцкага фарміравання або за ўдзел у ім. Што стала падставай для абвінавачання, пакуль не вядома. У траўні мінулага году ў Таццяны Пыцько і Вячаслава Лазарава нарадзілася дачка Ева. Пасля таго, як 6 чэрвеня маці затрымалі, яна знаходзіцца ў дзіцячым шпіталі пад наглядам лекараў, бо  бацька дзяўчынкі таксама ў СІЗА.

Суддзя суда Першамайскага раёна Віцебска Наталля Карабліна 31 траўня пастанавіла арыштаваць на 15 сутак жыхара Віцебска Аляксандра Сітава за тое, што ён правёў не дазволенае ўладамі  пікетаванне ў сацыяльнай сетцы «Інстаграм».