Паводле рашэння дэпутатаў  Віцебскага раённага Савета ад 29 лістапада 2024 г. № 31, былі зменены адміністрацыйныя межы вёскі Лушчыхі  шляхам уключэння зямельнага ўчастка плошчай 0,5436 гектара. З мясцовымі жыхарамі гэтае рашэнне папярэдне не ўзгаднялася. Таму людзям варта адсачыць, ці не парушае гэтае рашэнне іх правы і інтарэсы, даводзіць юрыст.

На сайце дзяржзакупак паведамляецца, што завершаны тэндар на закупку «знака с изображением государственного герба Республики Беларусь и текста государственного гимна Республики Беларусь». Гэта каштавала бюджэту 65 тысяч рублёў.

У Лепелі прайшоў так званы «Адзіны дзень інфармавання» - імпрэза, на якую сабралі супрацоўнікаў устаноў культуры Лепельшчыны, а таксама Цэнтра па забеспячэнні дзейнасці бюджэтных арганізацый раёна. Перад імі выступалі намеснік старшыні Віцебскага абласнога выканкама Вячаслаў Дурноў і намесніца начальніка аддзела ідэалагічнай работы, па справах моладзі, рэлігій і нацыянальнасцей галоўнага ўпраўлення ідэалагічнай работы і па справах моладзі аблвыканкама Ірына Сафейчанка.

Чарговы этап камандна-штабных вучэнняў з удзелам суб'ектаў дзяржаўнай сістэмы рэагавання адбыўся ў Віцебскай вобласці, паведамляе Тэлеграм-канал «Милиция Витебщины». Вучэнні адбыліся «на адным з ваенных палігонаў», на іх адпрацоўвалі «алгарытмы спынення парушэнняў заканадаўства на ўчастках для галасавання» і «дзеянні па спыненні групавых парушэнняў грамадскага парадку».