13 чэрвеня ў судовае паседжаньне па справе Андрэя Гайдукова выклікалі сьведак. «Гэта былі людзі ў міліцэйскай форме», — сказаў праваабаронца Павал Левінаў. Вольга Гайдукова паведаміла, што суд над яе сынам будзе працягнуты ў панядзелак, 17 чэрвеня. Так ёй сказалі адвакаты Андрэя Гайдукова. Яны паведамілі, што хлопец трымаецца спакойна, але па-ранейшаму не зусім здаровы: гаварыць ня можа праз кашаль. У наступны панядзелак працягнуць дапытваць сьведкаў. У прыватнасьці, у якасьці сьведкі ў суд выкліканы жыхара Наваполацку Ільля Багданаў.

12 чэрвеня Віцебскі абласны суд пачаў разглядаць справу Андрэя Гайдукова, 23-гадовага навапалачаніна, якога вінавацяць у «здрадзе дзяржаве». Суд закрыты. На працэс не дапушчаныя ні журналісты, ні праваабаронцы. Кіраўніцтва РГА “Беларускі Хэльсынскі камітэт” афіцыйна прасіла старшыню абласнога суду дапусьціць Паўла Левінава да працэсу над Гайдуковым, аднак праваабаронцу ў гэтым было адмоўлена без тлумачэньня прычын. Маці Гайдукова, якая жыве ў Полaцку, у суд не прыехала. Як лічыць Левінаў, гэта можа быць зьвязана з тым, што на жанчыну аказваюць ціск, запалохваючы яе.

Лідэр партыі БНФ Аляксей Янукевіч, кіраўнікі руху “За свабоду” Аляксандар Мілінкевіч, Юрась Губарэвіч і намесьнік каардынатара кампаніі “Гавары праўду” Андрэй Дзьмітрыеў у сваіх паездках па Берасьцейскім рэгіёне наведаюць Паўла Севярынца. Паводле слоў Аляксея Янукевіча гэта будзе ня толькі сустрэча на знак салідарнасьці, але і размова на важныя тэмы.

«Беларускі Хэльсынскі камітэт» і праваабарончы цэнтар «Вясна» выступілі з сумеснай заявай, у якой заклікаюць зрабіць адкрытым працэс над Андрэем Гайдуковым. Актывіста вінавацяць у здрадзе дзяржаве. Крымінальная справа накіраваная ў Віцебскі абласны суд.