Актывісты «Гавары праўду», руху “За свабоду”, аргкамітэту БХД, сабраліся разам для абмеркаваньня правядзеньня Дня Волі ў Віцебску, нягледзячы на афіцыйную забарону мясцовых уладаў. Удзельнікам сустрэчы было прапанавана напярэдадні сьвяткаваньня Дня Волі напісаць лісты палітвязьням. Усім прысутным былі раздадзеныя адмысловыя буклеты з адрасамі палітвязьняў, улёткі. Удзельнікамі сустрэчы было напісана каля 40 лістоў.

У Віцебску ў мясцовым “Эўрапейскім доме” адбылася ўрачыстая вечарына, прымеркаваная да 170-годзьдзя з дня нараджэньня Кастуся Каліноўскага і 95-годзьдзя абвяшчэньня Беларускай Народнай Рэспублікі. Падчас вечарыны таксама былі падведзеныя вынікі нацыянальнай дыктоўкі, пераможца якой – віцебская абласная каардынатарка БХД Тацьцяна Севярынец – атрымала каштоўны прыз – кнігі. На вечарыне ў падтрымку палітвязьняў выступілі кінарэжысэр Валер Мазынскі, які распавёў пра некаторыя са сваіх фільмаў, прысьвечаных рэпрэсаваным, і бард Андрэй Мельнікаў зь песьнямі са свайго новага альбому.

Як мы паведамлялі раней, Камітэт па правох чалавека ААН прызнаў, што ўлады Беларусі парушылі грамадзянскія і палітычныя правы Антаніны Піванос. Аднак улады не сьпяшаюцца выконваць рашэньне аўтарытэтнага міжнароднага воргану. Каб усё-такі дамагчыся рэалізацыі гэтага рашэньня на практыцы, віцебская актывістка вымушаная была зьвярнуцца ў суд.

Чарговым месцам правядзеньня маратону “Хваля салідарнасьці” стала мястэчка Гарадок Віцебскай вобласьці. Тут мясцовыя актывісты “Беларускай хрысьціянскай дэмакратыі” разам зь іншымі неабыякавымі людзьмі напісалі лісты палітвязьням. Мяркуецца, што маратон “Хваля салідарнасьці” пройдзе па 37 гарадох Беларусі і скончыцца акцыяй у Дзень Волі ў Менску.