На цэнтральныя вуліцах Віцебску зьявіліся бела-блакітныя сьцяжкі з выявай фірмовай кветкі “Газпрому”. Гэтак Віцебск сустракае гасьцей грандыёзнага карпаратыву - газпромаўскага фэстывалю “Факел”, які пройдзе ў горадзе з 13 па 20 траўня. Як дома «газпромаўцы» павінны адчуць сябе яшчэ на віцебскім вакзале - Прывакзальная плошча літаральна патанае ў фірмовых колерах расейскай энэргетычнай кампаніі, а на будынку ёсьць буйныя плякаты мерапрыемства. Сьцяжкамі з сымболікай фэстывалю ўпрыгожаныя таксама вуліцы Кірава, Замкавая, Леніна і праспэкт Фрунзе. Дзе-нідзе гэтыя сьцяжкі нават зачынілі дарожныя знакі.

Каардынатарка аргкамітэту па стварэньні партыі “Беларуская хрысьціянская дэмакратыя” Тацьцяна Севярынец атрымала адказ зь Міністэрства аховы здароўя Беларусі за подпісам намміністра Дзьмітрыя Піневіча на калектыўны зварот з заклікам прыняць меры да скарачэньня колькасьці абортаў у краіне. У адказе адзначаецца, што ўва ўсіх жаночых кансультацыях і моладзевых цэнтрах працуюць габінэты па плянаваньні сям’і, рэалізуецца Нацыянальны плян дзеяньняў па забесьпячэньні гендэрнай роўнасьці на 2011-2015 гады, які мусіць узьняць прэстыж сям’і і сфармаваць усьвядомленае бацькоўства.

Парушэньні працоўнай дысцыпліны выяўленыя ў РУП “Віцебскаўтадар”, паведаміла пракурор аддзелу па наглядзе за выкананьнем заканадаўства і законнасьцю прававых актаў пракуратуры Віцебскай вобласьці Натальля Калпакова. Парушэньні на прадпрыемстве і яго структурных падразьдзяленьнях у рэгіёнах вобласьці былі выяўленыя пры правядзеньні праверкі выкананьня патрабаваньняў працоўнага заканадаўства, заканадаўства аб ахове працы, дырэктыў № 1 “Аб мерах па ўмацаваньні грамадзкай бясьпекі і дысцыпліны” і № 3 “Эканомія і ашчаднасьць - галоўныя фактары эканамічнай бясьпекі дзяржавы”, заканадаўства аб прафіляктыцы правапарушэньняў і аб захаванасьці ўласнасьці.

Раённыя аддзелы Сьледчага камітэту ў Віцебску і Гомелі аб’ядноўваюцца ў гарадзкія. Адпаведны ўказ № 217 “Аб удасканаленьні сыстэмы Сьледчага камітэту” кіраўнік дзяржавы Аляксандар Лукашэнка падпісаў 8 траўня, паведамілі ў прэсавай службе беларускага лідэра. “Дакумэнтам прадугледжанае аб’яднаньне раённых аддзелаў Сьледчага камітэту ў Віцебску і Гомелі ў адпаведныя гарадзкія аддзелы Сьледчага камітэту”, - праінфармавалі ў прэс-службе. З прыняцьцем гэтага ўказу завяршаецца рэарганізацыя тэрытарыяльных падразьдзяленьняў Сьледчага камітэту ў абласных цэнтрах і гарадох абласнога падпарадкаваньня.

Пётар Іваноў абскарджваў пастанову судзьдзі Першамайскага райсуду Валянціны Кісьмярошкінай, якая пакарала яго штрафам у памеры 4 млн рублёў за нібыта лжэсьведчаньне супраць супрацоўнікаў ДАІ і непадпарадкаваньне міліцыянтам. На думку спадара Іванова, судзьдзя Кісьмярошкіна судзіла яго з грубымі парушэньнямі працэсуальна-выканаўчага кодэксу, і таму прасіў адмяніць яе рашэньне. Аднак судзьдзя віцебскага аблсуду пакінула пастанову суду першай інстанцыі ў сіле.

Палітвязень Павал Севярынец лічыць сьвята 9 траўня – сьвятам са сьлязамі ў вачох. Павал згодны з публіцыстам Алесем Чайчыцам, што 9 траўня – гэта “ідэалягічны кастыль для безыдэйных рэжымаў”. Паводле ягоных слоў, дзясяткі гадоў акцэнт рабілі на перамозе: “Але на тым, якім коштам далася гэтая перамога – ужо менш, на тым як пацярпелі ўсе мы – яшчэ менш. Пра тое, хто разьвязаў Другую сусьветную вайну, а падпальшчыкамі яе былі Сталін і Гітлер, увогуле гэты факт хавалі. Тое, што беларусы апынуліся паміж молатам і кавадлам у гэтай вайне, – гэта таксама факт”.

Падчас месячніку Чырвонага Крыжа, які ладзіцца ў траўні, сябры ініцыятыўных групаў пажылых па працы ў супольнасьці Віцебскай абласной арганізацыі Беларускага таварыства Чырвонага Крыжа (БТЧК) правядуць дабрачынную акцыю “Бабуліна казка”. Пра гэта паведаміла на прэсавай канфэрэнцыі старшыня Віцебскай абласной арганізацыі БТЧК Галіна Жаланава. Гэта новы праект абласной арганізацыі. Ініцыятыўныя групы пажылых людзей будуць наведваць спэцыялізаваныя дзіцячыя дамы, прытулкі, аддзяленьні дзённага знаходжаньня для маладых інвалідаў і расказваць выхаванцам гэтых устаноў казкі.

Камітэтам па правох чалавека ААН за № 2239/2013 зарэгістраваны трэці ў гэтым годзе зварот праваабаронцы Паўла Левінава. У сваім звароце Павал Левінаў просіць камітэт прызнаць Рэспубліку Беларусь парушальнікам правоў, гарантаваных Міжнародным пактам аб грамадзянскіх і палітычных правох.

Каб скласьці пратакол на сябра КХП-БНФ Віталя Каваленку, супрацоўнікі міліцыі прыехалі да яго на працу. Копію пратаколу яму не ўручылі, сказалі, што вышлюць па пошце. Брата былога палітвязьня Сяргея Каваленкі абвінавачваюць у правядзеньні несанкцыянаванага пікету ў цэнтры Віцебску 26 красавіка.

Усьлед за віцебскім абласным кіраўніком партыі БНФ Леанідам Аўтуховым у міліцэйскі пастарунак быў выкліканы яго аднапартыец Кастусь Смолікаў. Там, як раней і на Аўтухова, на яго склалі пратакол аб парушэньні Закону аб СМІ. Актывістаў абвінавачваюць у тым, што была перавышаная дапушчальная законам колькасьць партыйнага бюлетэню «Магістрат», які яны раздавалі мінакам 22 красавіка.