Гэта сапраўды так, калі верыць міліцэйскай статыстыцы, якая сцвярджае, што за апошнія 10 год у Віцебскай вобласці назіраецца дынаміка зніжэння злачынстваў па лініі крымінальнага вышуку. Іх колькасць скарацілася на 39 працэнтаў. Забойстваў знізілася на 44 працэнты, фактаў прычынення цяжкіх цялесных пашкоджанняў на 43,6 працэнта. У рэгіёне стала менш разбояў, угонаў аўта- і мотатранспарту, але значна павялічылася колькасць «палітычных» злачынстваў і дэліктаў з выкарыстаннем Інтэрнэту.

Суддзя суда Сенненскага Іна Досава 27 ліпеня за абразу следчага Сенненскага РАСК прыгаварыла мясцовага жыхара інваліда 2 групы Паўла Якубовіча да двух гадоў абмежавання волі без накіравання ва ўстанову адкрытага тыпу, да штрафу ў памеры 1850 рублёў і канфіскацыі камп'ютара.

Абласное выданне ўжо другі месяц публікуе выказванні прадстаўніцы КПБ, старшай навуковай супрацоўніцы інстытута гісторыі НАН, кандыдаткі гістарычных навук Алены Сакаловай, аўтаркі кнігі «Гиена Европы». У верасні рэдакцыя тройчы прадастаўляла старонкі газеты для трансляцыі меркавання пра тое, што Беларусь можа стацца ахвярай злавеснай палітыкі амерыканскага “Белага Дома”, якую падтрымлівае Варшава. У кастрычніку гэтая практыка працягваецца.

Суддзя і старшыня суда Лёзненскага раёна Алена Шарэц 13 верасня за распаўсюджванне "экстрэмізму" ў сацыяльнай сетцы пакарала грамадскімі праца на тэрмін 20 гадзін і канфіскавала тэлефон у маладога жыхара аграгарадка Дабрамыслі Іллю Самохіна.

За тры гады былі гвалтоўна зачыненыя 83 арганізацыі, якія служылі асновай грамадзянскай супольнасці ў Віцебскім рэгіёне. Гэты працэс працягваецца. У кастрычніку 2023 года Віцебскі абласны суд прыме рашэнне аб ліквідацыі трох грамадскіх аб'яднанняў.

Абласная газета «Витебские вести» апублікавала дзіўную статыстыку да Дня настаўніка, які ў Беларусі адзначылі ў першую нядзелю гэтага месяца – 1-га кастрычніка. Паводле выдання, на Віцебшчыне на кожнага педагога, паводле колькасці прадстаўнікоў гэтай прафесіі, прыпадае 10 вучняў. Пры гэтым газета ніводным словам не згадала, што настаўніцкія кадры – у дэфіцыте, бо працаваць у школе цяжка, не вельмі прэстыжна, дый заробкі невысокія.

Суддзя суда Бешанковіцкага раёна Кацярына Мацкевіч 15 верасня за ухіленне ад ўзгодненага з уладамі маршруту хрэснага ходу аштрафавала на 740 рублёў памочніка благачыннага па будаўніцтве цэркваў Храма святога прарока Іллі мясцовага жыхара Мікалая Бондара.

Суддзя суда Наваполацка Зінаіда Балаболава 19 верасня за распаўсюд у сацыяльных сетках «экстрэмісцкіх» публікацый пакарала арыштам на 15 сутак Аляксея Дзегцярова.

З пачатку 2023 года судамі Віцебскай вобласці былі разгледжаны 123 адміністрацыйныя пратаколы, складзеныя за абразу работнікаў міліцыі (артыкул 24.4 КаАП). А за непадпарадкаванне законным патрабаванням супрацоўнікаў міліцыі да адміністрацыйнай адказнасці па артыкуле 24.3 КаАП былі прыцягнуты 345 жыхароў вобласці. Усе правапарушальнікі былі пакараныя буйным штрафам альбо грамадскімі працамі ці адміністрацыйным арыштам.

28 верасня ў Наваполацкім гарадскім судзе 53-гадовага работніка “Нафтана” Іллю Двойрына прызналі вінаватым паводле ч. 1 арт. 339 Крымінальнага кодэкса (хуліганства). Суддзя Віталь Лапко пакараў мужчыну пазбаўленннем волі на адзін год умоўна.