Сёлета ў Віцебскай вобласці выпускнікамі школ і гімназій стануць каля 5,3 тыс. адзінаццацікласнікаў. Ужо летам юнакам і дзяўчатам давядзецца на сабе адчуць "аб'ектыўнасць" і "роўнасць", падрыхтаванае рэалізацыяй Указа №2 які не так даўно быў падпісаны цяперашнім кіраўніком краіны. Гэтым дакументам зацверджана новая рэдакцыя Правілаў прыёму асоб для атрымання агульнай вышэйшай і спецыяльнай вышэйшай адукацыі. Эксперты сцвярджаюць, што перад будучымі студэнтамі і іх бацькамі, верагодна, паўстануць нечаканыя перашкоды пры паступленні ў ВНУ. 

На пазачарговай сесіі Гарадоцкага раённага Савета дэпутатаў 18 студзеня было разгледжана кадравае пытанне. На пасаду старшыні Гарадоцкага райвыканкама аднагалосна была зацверджана дэпутат Палаты прадстаўнікоў Нацыянальнага сходу Рэспублікі Беларусь 43-гадовая Ірына Палякова. Многія жыхары Гарадка лічаць, што яе пераход з дэпутацтва ў старшыні, ёсць «праява эгаізму» і «здрада» інтарэсаў дзясяткаў тысяч выбаршчыкаў, дзеля асабістай кар'еры.

Вынікі працы Віцебскага абласнога аб'яднання прафсаюзаў за 2022 год былі разгледжаныя 17 студзеня на паседжанні прэзідыума Рады гэтага аб'яднання, якім кіруе чалец Рады Рэспублікі Юры Дзяркач. У мерапрыемстве, якое прайшло ў аблвыканкаме, прынялі ўдзел абласная і гарадская ўлада, старшыні раённых, галіновых аб'яднанняў прафсаюзаў, прадстаўнікі грамадскіх арганізацый вобласці. Радавыя члены прафсаюзаў на сходзе адсутнічалі.

За 2022 год самазанятымі жыхарамі Віцебскага регіёна выплачана ў бюджэт каля 3 млн руб., што ў дзеючых цэнах больш як у 1,7 раза перавышае аб'ём паступленняў за 2021 год, калі фізічныя асобы, якія ажыццяўляюць дзейнасць па заяўнаму прынцыпу, папоўнілі даходы бюджэту амаль на Br1,5 млн. Павелічэнне паступленняў было дасягнута праз павелічэнне ў два разы ставак падатку.