Нагадаем чытачам пра лёс праўдалюба ад мэдыцыны. Ігар Аляксеевіч скончыў мэдычны інстытут з чырвоным дыплёмам, працаваў участковым пэдыятрам. Да 2008 года ў яго працоўнай кніжцы толькі падзячныя запісы за добрую працу. Але як толькі Ігар Пастноў загаварыў услых пра хваробы віцебскай аховы здароўя, стаў ізгоем у сыстэме Міністэрства аховы здароўя.

17 верасьня праваабаронца Пётар Іваноў наведаў доктара Ігара Пастнова у Віцебскім абласным клінічным цэнтры псыхіятрыі і наркалёгіі, дзе той знаходзіцца на прымусовым лячэньні. Спадар Іваноў паведаміў, што напярэдадні яго візыту ў шпіталь адбылося паседжаньне ўрачэбна-кансультацыйнай камісіі, якая зьменшыла апальнаму доктару дозу нэўралептыкаў. Згодна з заключэньнем камісіі, неўзабаве Ігар Пастноў можа быць пераведзены на дзённы стацыянар.

Аргкамітэт па стварэньні партыі “Беларуская хрысьціянская дэмакратыя” (БХД) заклікае ўсе незалежныя дэмакратычныя арганізацыі Беларусі прызнаць віцебскага лекара Ігара Пастнова вязьнем сумленьня. “БХД выказвае рашучы пратэст супраць выкарыстаньня псыхіятрычных лячэбных устаноў Беларусі з рэпрэсіўнымі мэтамі, — адзначаецца ў паведамленьні прэс-службы. — Мы зьвяртаем увагу на тое, што ў Беларусь вяртаецца савецкая практыка карнай псыхіятрыі. Віцебскага доктара Ігара Пастнова, які неаднаразова выступаў з крытыкай улады, ужо амаль месяц прымусова ўтрымліваюць у псыхбольніцы”.

У сувязі зь вялікай затрымкай выплаты заробкаў на ААТ «КІМ» 10-11 верасьня на прадпрыемстве адбыліся хваляваньні работнікаў. Як паведаміла «Народным навінам Віцебска» крыніца на фабрыцы, яшчэ ня выплачаная заработная плата за ліпень, а некаторым катэгорыям работнікаў - за чэрвень. 10 верасьня адмовілася працаваць другая зьмена аднаго з цэхаў, а 11 верасьня - першая.

Паводле інфармацыі ўпраўленьня Камітэту дзяржаўнай бясьпекі па Віцебскай вобласьці была праведзена праверка фінансава-гаспадарчай дзейнасьці РУП “Віцебскі ДСК”. Падчас рэвізіі згаданага прадпрыемства выяўлены шэраг грубых парушэньняў заканадаўства ў сфэры жыльлёвага будаўніцтва.

У Віцебску з 5 па 30 верасьня праходзіць абласны фэстываль-конкурс творчага і дэкаратыўна-прыкладнога мастацтва для людзей з абмежаванымі магчымасьцямі «Сонечны сьвет для ўсіх». Гэткае мерапрыемства адбылося ў абласным цэнтры і летась. У гэтым сьвяце бяруць удзел каля 100 чалавек з абмежаванымі магчымасьцямі з розных гарадоў рэгіёну.

Дольшчыкі будаванага ў Віцебску на Маскоўскім праспэкце дому № 105 зьбіраюцца зьвярнуцца ў Камітэт дзяржкантролю, каб высьветліць, зь якой прычыны пастаянна пераносяцца тэрміны здачы іхнага жытла. Гэты дом у мікрараёне «Білева-2» пачаў будавацца ТАА «Будгандальсэрвіс» яшчэ ў 2010 годзе, і згодна з плянам будаўніцтва мусіла завяршыцца ў 2012 годзе. Аднак да канца падыходзіць трэці квартал ўжо 2013 году, а дольшчыкі так і не засяліліся ў свае кватэры.

Аляксандар Лукашэнка разьлічвае, што арышт ксяндза Лазара прымусіць Ватыкан «адкрыць» Эўропу беларускаму рэжыму. Такое меркаваньне выказаў палітвязень Павал Севярынец, камэнтуючы абвінавачваньне ксяндза Лазара ў здрадзе дзяржаве: «Для сёньняшняга рэжыму царква ў цэлым - гэта чужая сіла і пагроза. А кошт тых абвінавачаньняў, якія фабрыкуюцца ў турме КДБ, мы добра ведаем і ня верым ні сьледзтву, ні працэсам у духу сталінскіх часоў».

Мэханізм рэалізацыі дзяржаўнага сацыяльнага заказу ў 2014 годзе плянуецца ўкараніць у шасьці раёнах Віцебскай вобласьці. Пра гэта паведаміла журналістам старшыня абласной арганізацыі Беларускага таварыства Чырвонага Крыжа (БТЧК) Галіна Жаланава. Яна падкрэсьліла, што Віцебшчына актыўна ўключылася ў рэалізацыю новай рэдакцыі закону аб сацыяльным абслугоўваньні, бо ў жыхароў вобласьці існуе вялікая патрэба ў аказаньні розных відаў дапамогі. Гэта абумоўлена тым, што ў агульнай структуры насельніцтва рэгіёну доля пажылых людзей найвялікшая ў рэспубліцы.

Касацыйная скарга віцебскага лекара Ігара Пастнова наконт накіраваньня яго на прымусовае лячэньне ў абласны цэнтар псыхіятрыі і наркалёгіі пакінутая без задавальненьня, паведаміў мясцовы праваабаронца Леанід Сьвецік. Скарга была разгледжаная 12 верасьня Віцебскім абласным судом у закрытым рэжыме. Пастноў прасіў адмяніць рашэньне суду Віцебскага раёну і запрасіць яго на разгляд уласнай скаргі. Абедзьве просьбы задаволеныя не былі.