40-гадовую Ганну Тукаву затрымалі 1-га верасня падчас урачыстай лінейкі ў наваполацкай гімназіі. Яна прывяла ў школу сваю дачку і ўбачыла «паказальны выступ» падлеткаў у вайсковай форме, якія імітавалі баявыя дзеянні і расстрэл палонных. Жанчына выйшла ў цэнтр пляцоўку, паказваючы абедзвюма рукамі сімвалы «V», за што была затрымана міліцыяй.

Суд Наваполацка 3 верасня вынес пастанову аштрафаваць Ганну Тукаву за антываенную акцыю. Суд прызнаў яе вінаватай і прымяніў да дзяўчыны арт. 24.23 (Парушэнне парадку арганізацыі або правядзення масавых мерапрыемстваў) Кодэкса аб адміністрацыйных правапарушэнняў. Прычынай «мяккага», для цяперашняга часу, пакарання стала тое, што «парушальніца закону» мае малалетняга дзіцяці. Але пасля прысуду Ганна так і не выйшла на волю.

У Наваполацкім гарадскім судзе адбыўся працэс над Кацярынай Вінакуравай, якую прызналі вінаватай паводле артыкула 19.11 КаАП. Маладую жанчыну аштрафавалі за рэпост артыкула пра смерць паэта і мастака Міхала Анемпадыстава, які сышоў у лепшы свет у 2018 годзе. Пра гэта шырока паведамлялася ў незалежным друку, і жыхарка Наваполацку тады ж зрабіла рэпост з аднаго з найстарэйшых беларускіх выданняў, якое праз некалькі год прызналі экстрэмісцкім.

5 чэрвеня ў полацкай кватэры Палынскіх прайшоў ператрус. Непасрэднай прычынай інтарэсу сілавікоў да Ціны Палынскай сталі яе допісы ў Фэйсбуку напярэдадні візіту ў Полацк Патрыярха Кірыла. 6 чэрвеня, падчас сустрэчы палачанаў з  кіраўніком Рускай праваслаўнай царквы ў Беларусі, журналістку затрымалі міліцыянты, якія заўважылі ў яе на сумцы  і на фотаапараце жоўтыя і блакітныя стужкі.

Пастаўскі раённы суд прызнаў ксяндза Анджэя Бульчака вінаватым у распаўсюдзе экстрэмісцкіх матэрыялаў. Суд прайшоў без падсуднага: Андрэй Бульчак пакінуў Беларусь 29 сакавіка, даведаўшыся, што супраць яго распачалі адміністрацыйную справу. Ксёндз заявіў, што не лічыць сябе вінаватым, і не будзе падтрымліваць рэжым штрафамі ў дзяржаўны бюджэт.

Бела-чырвона-белы сцяг зрабіўся галоўным сімвалам акцый пратэсту супраць вынікаў прэзідэнцкіх выбараў у жніўні 2020 году, сілавы гвалт за выкарыстанне нацыянальнай сімволікі працягваецца і зараз. Па выніках 2021 году, у Менску за выкарыстанне сімволікі ў нацыянальных колерах былі асуджаны 139 чалавек, У Менскай вобласці – 51, у Віцебскай – 39, у Гомельскай -30, у Берасцейскай – 28, у Магілеўскай -11. Вынікі і асаблівасці судовых справаў прааналізаваў Беларускі ПЭН.

5 красавіка Камітэт паведаміў грамадзянскаму актывісту з Віцебску Мікалаю Качурцу аб тым, што яго паведамленне аб парушэнні правоў з боку беларускай дзяржавы прымальна для разгляду Камітэтам па сутнасці. "Ваша паведамленне лічыцца працэсуальна гатовым для прыняцця Камітэтам рашэння аб прымальнасці і па сутнасці" - напісаў у афіцыйным дакуменце кіраўнік Сектара дагавораў аб правах чалавека Ібрагім Салама. Гэта азначае, што ў вялікай верагоднасцю Мікалай зможа абараніць сябе ад самавольства ўлад.

Судом Дубровенскага раёну быў вынесены прысуд паводле арт. 369 КК («Знявага прадстаўніка ўлады») у дачыненні 40-гадовага мясцовага жыхара Юрыя Свіцына. Па версіі следства, ён абразіў пракурора Дубровенскага раёну Міхаіла Пацеева. Суд прызначыў пакаранне абвінавачанаму ў выглядзе трох гадоў абмежавання волі без накіравання ва ўстанову адкрытага тыпу і штрафам у 2900 рублёў.

Напрыканцы чэрвеня 2021 году ў аддзел унутраных справаў Кастрычніцкага раёну Віцебску паступіла заява ад дырэктара аднаго з дзяржпрадпрыемстваў аб тым, што невядомы залатой фарбай нанёс надпісы ў грамадскім месцы. Міліцыянты вывучылі запісы з камер відэаназірання і ўстанавілі, што гэта зрабіла 21-гадовая жыхарка Віцебску. У дачыненні яе завялі крымінальную справу. Ці мелі надпісы пратэставы характар, не паведамляецца.

Ад пачатку 2021 году раённымі судамі Віцебскай вобласці 29 тэлеграм-чатаў, груп і каналаў пратэставага зместу былі прызнаныя экстрэмісцкімі. Аднак на сайце Міністэрства інфармацыі Беларусі не пазначана, за якія канкрэтныя публікацыі суддзі вынеслі рашэнні аб прызнанні таго ці іншага матэрыялу экстрэмісцкім.