Спартовы журналіст, блогер і футбаліст «Крумкачоў» Аляксандр Івулін быў асуджаны 19 лютага на два гады калоніі агульнага рэжыму. Суд Савецкага раёну Менску прызнаў яго вінаватым ва ўдзеле ў дзеяннях, якія груба парушаюць грамадскі парадак (ч.1 арт. 342 КК). Апроч таго, абвінавачанне палічыла, што журналіст на сваім ютуб-канале «ЧестнОК» размяшчаў відэазапісы, заахвочвальнага характару, каб стварыць негатыўную ацэнку дзейнай улады.

18 студзеня ў судзе Полацкага раёну адбылося чарговае паседжанне ў межах крымінальнай справы, распачатай у дачыненні 38-гадовага рамесніка Руслана Слуцкага. Мужчыну абвінавачваюць у акце тэрарызму (ч. 1 арт. 289 КК) і ў замаху на прывядзенне ў непрыгоднасць чыгуначных пуцей (ч. 1 арт. 14, ч. 1 арт. 309 КК). Падчас судовых спрэчак пракурорка Таццяна Шабека запрасіла для мужчыны 11 гадоў калоніі ва ўмовах узмоцненага рэжыму.

18 студзеня 2022 году суддзя Віцебскага абласнога суду Вікторыя Лешчанка прыняла рашэнне ліквідаваць два грамадскія аб'яднанні – «Віцебскі жаночы клуб» і «Віцебскае абласное таварыства хворых на гемафілію». Ініцыятарам ліквідацыі грамадскіх арганізацый стала галоўнае ўпраўленне юстыцыі Віцебскага абласнога выканаўчага камітэту. Толькі ў студзені 2022 году ўлады ліквідавалі пяць грамадскіх абʼяднанняў.

17 студзеня суд Віцебскага раёну прызнаў прадпрымальніка Уладзіміра Мунякіна вінаватым у махлярстве ў асабліва буйным памеры (ч.4 арт.209 КК.) і асудзіў на 6 гадоў пазбаўлення волі ў калоніі ўзмоцненага рэжыму са штрафам у памеры 150 базавых велічынь. Паводле прысуду, Мунякін махлярскім чынам прысабечыў маёмасць 124-х пацярпелых на агульную суму каля 146 тысяч рублёў.