«Дом мы будавалі ўсё жыццё, ён у нас вялікі, з усімі выгодамі, з газам, вадой, лазняй, участак там, парнікі. Усё, што можа быць у людзей, калі яны працавітыя. Уклалі ў яго шмат грошай, сілаў — для сябе ж стараліся», -- распавяла Ганна Федаронак беларускаму Радыё Свабода.

Цяпер жанчына жыве ў Варшаве, загадвае  шэлтарам для ўцекачоў. А свае творчыя здольнасці рэалізуе ў відэапраектах, дзе выконвае ролю вясковай жыхаркі, якая імкнецца зразумець і патлумачыць суседзям навіны беларускай палітыкі. Яе апошні праект называецца  «Лукашолкі», і гэтая назва гаворыць сама за сябе.

У лютым 2023 года суд Пастаўскага раёну прызнаў «экстрэмісцкімі» старонкі актывісткі ў Фэйсбуку і ў «Одноклассниках». Сёлета ў лютым Ганну Федаронак ўнеслі ў міждзяржаўную пошукавую базу, агульную для Беларусі і Расіі.

Георгій Ротаў