Рэдактар сайта у лістападзе 2020г. вымушана пакінуў Беларусь. Сёлета ў сярэдзіне красавіка ў хаце, дзе жывуць ягоныя бацькі, быў праведзены ператрус – Аляксандр Корнышаў там прапісаны. З жытла нічога не забіралі – ягоных асабістых рэчаў там даўно няма.

Пратаколы пра адміністрацыйнае правапарушэнне  і позвы ў суд мужчына атрымаў незвычайным чынам. Іх даслалі ў асабістыя паведамленні у сацыяльнай сетцы «ВКонтакте». Як высветлілася, міліцыянты таксама маюць там акаўнты, і з іх даслалі дакументы Аляксандру Корнышаву.

Паводле пратаколаў,  сёлета ў красавіку ён некалькі разоў на сваёй старонцы  у сацыяльнай сетцы «ВКонтакте»  размясціў  спасылкі на матэрыялы сайта сайт «Витебский курьер news»,  «знаходзячыся па месцы жыхарства ў Віцебску, а таксама ў іншых нявызначаных месцах».  У пратаколах таксама пазначана, што ў пастарунак на азнаямленне з матэрыяламі сваіх адміністрацыйных справаў ён «не з'явіўся».

У адпаведнасці з позвамі ў суд, Аляксандр Корнышаў павінны з'явіцца на разборы сваіх адміністрацыйных справаў 16 і 20 траўня, але ў раскладах суда Першамайскага раёна  на гэтыя дні ягонага імя і прозвішча няма.  Зрэшты, такое ў Віцебску здараецца нярэдка: міліцыянты прызначаюць даты судовых працэсаў паводле ўласнага жадання, не ўзгадняючы іх з судамі. Таму чалавек, з'яўляючыся ў суд з позвай ад міліцыянтаў, сутыкаецца з тым, што пра ягоную справу ў судзе нават і не чулі. Яму тлумачаць, што выкліку варта чакаць непасрэдна з суду. Але ў міліцыі зноў і зноў бяруць на сябе чужыя абавязкі, зводзячы ў зман даверлівых грамадзянаў.

Зрэшты, Аляксандр Корнышаў, які ўжо некалькі год жыве з замежжы, на суд у Віцебск ехаць не збіраецца. Для яго гэта звязана з рызыкай быць затрыманым і асуджаным па крамінальным абвінавачанні: 10 траўня яго ўключылі ў «экстрэмісцкі» пералік МУС як удзельніка «экстрэмісцкага фармавання «Еўрапейскі выбар». 

Віталь Палякоў