Палачанка Юлія Перапеч, мяркуючы па сацыяльных сетках, выглядае даволі нетыпова ў параўнанні з традыцыйным вобразам “звычайнай настаўніцы”. І справа не толькі ў модным моладзевым адзенні: жанчына спявае, вядзе анлайн-дыскусіі і выкладае  ў сацсеткі  разважанні пра ўласнае жыццё і сваю прафесію.  Некаторыя відэаролікі яна здымала непасрэдна ў школе, што і стала пачаткам канфлікту з адміністрацыяй.

Па словах настаўніцы, бацькі яе вучняў ніколі не мелі заўваг да яе блогерства, а дзеці - тым болей: у прыватнасці, Юлія распавяла і пра тое, што з удзелам школьнікаў “раскруціла” Instagram  СШ №18. Але адміністрацыя запатрабавала, каб усе ролікі “школьнай” тэматыкі настаўніцы выдаліла са свайго відэаблога.

Яшчэ месяц таму было падобна, што кампраміс знойдзены: Юлія Перапеч паабяцала змяніць фармат відэа.  Аднак  ужо ў сакавіку яна распавяла сваім падпісчыкам, што адміністрацыя школы запатрабавала або  выдаліць усё, што здымалася ў школе раней, або звальняцца. «На раздумье дали полчаса», - распавяла настаўніца. І патлумачыла  , што абрала звальненне, бо лічыць сябе “творчай натурай”,  і ёй шкада выдаляць кантэнт відэаблога, які вядзе ўжо 6-ты год.

Таксама яна размясціла ролік пра сваё развітанне з вучнямі (Юлія была класнай кіраўніцай у 7-м класе) і пра тое, што яны зразумелі ейны учынак.

 У TikTok Юлія Перапеч мае амаль  218 тысяч падпісчыкаў і больш за 73 тысячы падпісчыкаў ў Instagram. Каментуючы відэа пра вымушанае звальненне, прыхільнікі Юліі пішуць пра тое, што  яе былыя калегі - рэтраграды, што яны захраслі з мінулым стагоддзі, што сучасная беларуская школа - гэта “савок”, у якім баяцца любой ініцыятывы.

Таццяна Марыкава