Усяго прагаласавала больш 25,5 тысяч чалавек. Амаль 19,5 тысяч апытаных (75%) лічаць, што ў грамадзкім транспарце Воршы мае гучаць беларуская мова, 5,9 тысяч (22%) удзельнікаў апытанкі выбралі расейскую мову. За дзьвюхмоўе ў транспарце прагаласавалі 324 чалавекі (1%).
Вынікі прамежкавыя, бо апытаньне на сайце Аршанскага райвыканкаму працягваецца.
Правядзеньня афіцыйнага апытаньня дамагліся мясцовыя актывісты, якія колькі гадоў запар спрабуюць беларусізаваць аршанскі грамадзкі транспарт. Ворша – адзіны горад у Віцебскай вобласьці, дзе прыпынкі абвяшчаюць толькі па-расейску. Раней улады спасылаліся на тое, што ў Беларусі дзьве дзяржаўныя мовы і перакладаць абвесткі з расейскай мовы на беларускую – немэтазгодна.
Скрын старонкі на сайце райвыканкаму з апытаньнем
Пад апошняй электроннай пэтыцыяй за вяртаньне беларускай мовы ў грамадзкі транспарт Воршы падпісаліся каля 400 чалавек. Але пасьля гэтага на афіцыйным сайце райвыканкаму зьявілася анлайн-апытаньне.
У адказе на зварот аршанскага актывіста Арцёма Сізінцава першы намесьнік старшыні Аршанскага райвыканкаму Сяргей Пац паведаміў, што “пасьля дэталёвай прапрацоўкі дадзенага пытаньня будзе прынятае адпаведнае рашэньне…”
Паводле Паца, апытаньне праводзіцца ня толькі на сайце, але і “ў арганізацыях Аршанскага раёну”.
Зьміцер Міраш