13 траўня Віцебскі абласны суд вынес рашэнне наконт прыватнай скаргі віцяблянкі Алены Шабуні на пастанову суду Кастрычніцкага раёну аб пакіданні без руху скаргі на рашэнне пракурора Віцебскай вобласці. Скаргу ў аблсудзе разглядаў суддзя Віктар Быстроў. Алена Шабуня на судзе не прысутнічала.

13 траўня суд Віцебскага раёну завяршыў даследаванне матэрыялаў справы жыхаркі пасёлку Ноўка Таццяны Туравец, абвінавачанай у гвалце ў дачыненні да супрацоўнікаў МУС (арт. 364 КК). У судзе абвесцілі перапынак да 24 траўня.

12 траўня Полацкі суд вынес тры пастановы паводле артыкулу 24.23 КаАП за нібыта ўдзел грамадзян у несанкцыянаваных масавых мерапрыемствах. У выніку – два арышты і адзін штраф у памеры больш за 2000 рублёў.

Стала вядома, што Камітэт па правах чалавека ААН зарэгістраваў пад нумарам 3794/2020 індывідуальную скаргу аршанскага блогера Дзмітрыя Казлова («Шэры кот»). Сеткавы журналіст настойвае на тым, што беларуская дзяржава парушыла яго права на публічнае выказванне меркавання і на ўдзел у выбарах у якасці кандыдата ў дэпутаты парламенту.

Суд Чыгуначнага раёну Віцебску 12 траўня разгледзеў адміністрацыйную справу 19-гадовай Ангеліны Туравец, затрыманай 9 мая каля плошчы Перамогі. Яе забралі толькі за тое, што назірала за афіцыйным парадам з бел-чырвона-белай усмешкай на масцы. Міліцыя ўспрыняла гэта як несанкцыянаванае пікетаванне (арт. 24.23 КаАП).

Старшыня Магілёўскага абласнога суду Ігар Прошка не задаволіў просьбу сваякоў палітыка Паўла Севярынца аб разглядзе ягонай крымінальнай справы ў адкрытым фармаце. Пра гэта паведаміла маці апазіцыйнага палітыка Таццяна Севярынец.

Віцебскі абласны суд разгледзіць прыватныя скаргі праваабаронцы Паўла Левінава на вызначэнне суддзі суду Чыгуначнага раёну Віцебску Святланы Варатынскай. Яна адмовілася адправіць у аблсуд апеляцыйныя скаргі праваабаронцы, у якіх ён патрабуе адмены забароны працы Тэлеграм-каналаў «Віцебск 97%» і «Чат неверагоднага Віцебска». Пасяджэнне судовай калегіі па грамадзянскіх справах адбудзецца 24 траўня 2021 года ў будынку аблсуду ў 14-30 і 15-00 адпаведна па кожным канале.

У судзе Віцебскага раёну 7 траўня прайшлі чарговыя слуханні ў справе жыхаркі пасёлку Ноўка Таццяны Туравец. Па версіі міліцыі, 9 лютага Туравец адмовіла міліцыянтам праводзіць вобшук у сваім доме і чыніла ім супраціў. Жанчыну абвінавачваюць паводле арт. 364 КК. У сённяшнім паседжанні суд апытаў сведкаў Рабавых, заслухаў абвінавачаную і вырашыў пытанне аб правядзенні таваразнаўчай экспертызы.

За ўдзел у інтэрнэт-пікеце старшы інспектар маёр міліцыі Ўладзімір Казлоўскі склаў пратакол аб адміністрацыйным правапарушэнні ў дачыненні віцебскай грамадзянскай актывісткі Караліны Цярэнцьевай. Матэрыялы справы будуць разгледжаныя 17 мая 2021 года ў 10-30 суддзём суду Першамайскага раёну Віцебску Міхаілам Юрчанкам.

У судзе Чыгуначнага раёну Віцебску 7 траўня судзілі траіх дзяўчат – Лізавету Кірыенка, Марыю Агіевіч і Марыю Амасовіч. Усе трое знаходзяцца ў ізалятары часовага ўтрымання, таму суд праходзіў праз «Скайп». Дзяўчат прызналі вінаватымі ў несанкцыянаваным пікетаванні, якое яны нібыта здзейснілі 27-га сакавіка пад мостам імя Кірава ў Віцебску, паведамляе Беларускае Радыё Рацыя.