4 жніўня спаўняецца два гады з таго моманту, як кіраўнік праваабарончага цэнтру «Вясна» Алесь Бяляцкі апынуўся за кратамі. Міжнародныя праваабарончыя арганізацыі прызналі вядомага беларускага праваабаронцу вязьнем сумленьня і патрабуюць ад уладаў краіны яго неадкладнага вызваленьня. У другую гадавіну зьмяшчэньня Алеся Бяляцкага пад варту яго віцебскія калегі вырашылі зладзіць шэраг пікетаў.

На 27 ліпеня ў Віцебску замоўлены пікет салідарнасьці з палітвязьнямі. Заяўку пра гэта ў адміністрацыю Першамайскага раёну накіравалі актывісты Хрыстафор Жаляпаў і Аляксей Гаўруцікаў. У заяве гаворыцца, што мэта пікетаваньня – сьвяткаваньне ўгодкаў прыняцьця Дэклярацыі пра незалежнасьць Беларусі і патрабаваньне неадкладнага вызваленьня і рэабілітацыі палітвязьняў. Мерапрыемства плянуецца ў вызначаным уладамі месцы – у Парку імя 30-годзьдзя ВЛКСМ.

Сустаршыня Беларускай хрысьціянскай дэмакратыі Павал Севярынец, які адбывае тры гады абмежаваньня волі за Плошчу-2010 у Купліне, атрымаў трохдзённы адпачынак, падчас якога ён наведаў Віцебск, дзе жывуць яго бацькі. Да заканчэньня тэрміну зьняволеньня Паўлу засталося тры месяцы.

Любоў Кавалёва і Тацьцяна Козяр – маці і сястра асуджанага да сьмяротнага пакараньня і расстралянага 15 сакавіка 2012 году Ўладзіслава Кавалёва, абіванавачанага ў тэракце ў мэтро ў Менску, зьвярнуліся ў суд Кастрычніцкага раёну сталіцы са скаргай на неправамерныя дзеяньні Дэпартамэнту выкананьня пакараньняў, Міністэрства ўнутраных спраў і Камітэту дзяржбясьпекі. Родныя Кавалёва лічаць, што адмова паведаміць зьвесткі пра месца пахаваньня Ўладзіслава парушае міжнародныя стандарты, а таксама зьвяртаюць увагу на парушэньне Закону “Аб зваротах грамадзян”.

Жыхары Віцебску зьвярнуліся ў аблвыканкам з заявай аб зьмяненьні парадку прыняцьця рашэньняў аб правядзеньні масавых мерапрыемстваў у горадзе. Калектыўны ліст падпісалі 40 чалавек. Зварот вымушаны, бо цягам некалькі апошніх гадоў віцебскія ўлады не далі ніводнага дазволу на правядзеньне ніводнага мітынгу альбо пікету.

У пракуратуру Віцебскай вобласьці за першае паўгодзьдзе паступіла 60 электронных зваротаў грамадзян, паведаміла намесьніца начальніка арганізацыйна-кантрольнага аддзелу ведамства Сьвятлана Зайцава. Паводле ейных слоў, усяго за першае паўгодзьдзе ў ворганы пракуратуры вобласьці паступіла каля 4,7 тыс. пісьмовых зваротаў. На асабістым прыёме супрацоўнікамі прынятыя 2,9 тыс. чалавек, зь іх 441 - па месцы жыхарства і працы.

Напярэдадні 22-ай гадавіны абвяшчэньня незалежнасьці Рэспублікі Беларусь, „Дыялёг” вырашыў даведацца, якія мерапрыемствы на гэты дзень плянуе абласны кіраўнік партыі БНФ Леанід Аўтухоў.

Прызнаны вінаватым у спробах устанавіць кантакты з замежнымі спэцслужбамі Андрэй Гайдукоў абскардзіў прысуд Віцебскага абласнога суду, скаргу плянуюць накіраваць у Вярхоўны суд пры канцы наступнага тыдня. “Касацыйная скарга Гайдукова паступіла. У цяперашні час мы знаёмім зь ёй дзяржаўнага абвінаваўцу”, - паведамілі агенцтву “Інтэрфакс-Захад” у Віцебскім абласным судзе.

Трыкатажнае прадпрыемства ААТ “КІМ” (Віцебск) можа быць далучанае да віцебскага ААТ “Сьвітанак”. Пра гэта заявіў прэм’ер-міністар Міхаіл Мясьніковіч 16 ліпеня падчас наведваньня віцебскага прадпрыемства. Зараз ААТ “КІМ” зьяўляецца стратным і ўстойліва неплацежаздольным з-за фактычнага поўнага зносу абсталяваньня, нізкіх аб’ёмаў вытворчасьці, значных даўгавых абавязальніцтваў і недахопу абаротных сродкаў, што не дазваляе своечасова закупляць сыравіну, фарбавальнікі, хімікаты, разьлічыцца за энэргарэсурсы.

16 ліпеня пад старшынствам прэм’ер-міністра Міхаіла Мясьніковіча ў Віцебску прайшло выязное паседжаньне Прэзыдыюму Савету Міністраў Беларусі па пытаньні выкананьня Віцебскім аблвыканкамам прагнозных паказчыкаў сацыяльна-эканамічнага разьвіцьця. Паводле слоў прэм’ера, у Віцебскай вобласьці насьпелі некаторыя праблемныя пытаньні. У прыватнасьці, у рэгіёне адзначаюцца самыя нізкія тэмпы ўводу жытла па краіне, па выніках пяці месяцаў ня выкананыя дзьве траціны асноўных паказчыкаў сацыяльна-эканамічнага разьвіцьця.