Раней была канфіскаваная кампутарная тэхніка і тэлефон. У аўторак 24 лістапада Наталля Стрэльчанка адправілася раніцай у райаддзел СК, каб забраць канфіскаваныя раней рэчы. Але спроба абярнулася новым ператрусам.

«Сёння раніцай хадзіла ў Дубровенскі следчы камітэт забраць рэчы. Прыйшла, прачакала паўтары гадзіны – на месцы не было намесніка начальніка, а потым сказалі прыходзіць пасля абеду. Я прыйшла дадому, а тут міліцыянты з новай пастановай пра ператрус. Я ў шоку!» – падзялілася Наталля Стрэльчанка.

Гэтым разам супрацоўнікам міліцыі нічога цікавага для сябе не ўдалося знайсці.

«Забароненых аб'ектаў ня выяўлена», – запісаў у пратаколе ператрусу маёр міліцыі Юрый Кавалёў.

Віктар Бугаёў – стваральнік і аўтар суполкі «Усе пра Дуброўна». Праз актыўную грамадзянскую і палітычную пазіцыю трапіў пад пераслед мясцовых уладаў, 3 гады таму быў вымушаны пакінуць Беларусь.

Уладзімір Бяляўскі