Сам Пастноў падпісаў дакумэнт аб ужываньні амністыі толькі 25 верасьня, бо да гэтага знаходзіўся на дабравольным лячэньні ў Віцебскім абласным клінічным цэнтры псыхіятрыі і наркалёгіі.
Тры гады “хіміі” яму прысудзілі за паклёп на пракурора (ч.2 арт. 188 КК). Прысуд набыў законную сілу 19 ліпеня 2019 году, але да адбываньня пакараньня так і не дайшло.
Як гаворыцца ў пастанове, злачынства, учыненае Пастновым, не пагражае вялікай небясьпекай грамадзтву, а сам Пастноў “не зьяўляецца злосным парушальнікам устаноўленага парадку адбываньня пакараньня”.
“Сумаў, падлеглых спагнаньню па дадзеным прысудзе, а таксама іншых падставаў, якія б перашкаджалі вызваленьню ад пакараньня ў адпаведнасьці з арт. 9 і 11 Закону РБ ад 19 ліпеня 2019 году “Аб амністыі…”, ня мае”, – сьцьвярджаецца ў дакумэнце.
Нагадаем, што адзінай перашкодай для амніставаньня Пастнова была другая крымінальная справа, распачатая супраць яго за разгалашэньне дадзеных закрытага судовага паседжаньня (ч.1 арт. 407 КК РБ), але яна была спыненая 2 верасьня.
Такім чынам, Ігар Пастноў вызваляецца ад адбываньня трох гадоў “хіміі”, да якой прысудзіў яго суд Бешанковіцкага раёну.
Пастанова аб ужываньні амністыі прынятая начальнікам АУС адміністрацыі Кастрычніцкага раёну Віцебску Сяргеем Стэльмахам і зацьверджаная выканаўцам абавязкаў пракурора Віцебскай вобласьці Уладзімерам Гукам.
Зьміцер Міраш