Як віцебскія камуністы адзначылі дзень Кастрычніцкай рэвалюцыі

Чацвер, 07 Лістапад 2019

Як віцебскія камуністы адзначылі дзень Кастрычніцкай рэвалюцыі – шмат фота

Ацаніць гэты матэрыял

(6 галасоў)

Удзельнікі сходу на плошчы Леніна

Каля 70 чалавек сабраліся 7 лістапада каля помніка Леніну ў Віцебску, каб адзначыць сьвята, якое ў Беларусі носіць назву «Дзень Кастрычніцкай рэвалюцыі». Удзельнікі ўсклалі кветкі да помніку «правадыра» і правялі імправізаваны мітынг. За дзеяй назіралі супрацоўнікі міліцыі ў цывільным, але нікога не папярэджвалі і не затрымлівалі.

Удзельнікі трымалі ў руках два транспаранты з цытатамі Уладзімера Маякоўскага («Да здравствует Революция, радостная и скорая. Это единственная великая война из всех, что знала история») ды Іосіфа Сталіна («Наше дело правое – победа будет за нами»).

Маладыя людзі разгарнулі таксама два чырвоныя сьцягі зь сярпом і молатам.

Прадстаўнікі афіцыйнай Камуністычнай партыі Беларусі (КПБ) трымаліся асобна. Першы сакратар Віцебскага абкому КПБ Аляксандар Дзядзінкін згуртаваў сваіх прыхільнікаў у цеснае кола, прамовіў словы віншаваньня і запрасіў ускласьці да пастамэнту загадзя раздадзеныя гвазьдзікі. Пасьля гэтага сябры КПБ пакінулі плошчу Леніна.

Сябры праўладнай КПБ гуртаваліся збоку

Аляксандар Дзядзінкін

Свой «мітынг» і ўскладаньне кветак зладзілі і апазыцыйныя камуністы – сябры партыі «Справядлівы сьвет» і левых моладзевых груповак.

З «палымянай камуністычнай прамовай» з нагоды сьвята выступіў «віцебскі Ленін» Арцём, які называе сябе сябрам Усесаюзнай кампартыі бальшавікоў. Казаў, што «вялікі Кастрычнік» павінен супрацьпаставіць прыватнай уласнасьці і эгаізму ўсеагульную роўнасьць і любоў. Паводле Арцёма, “7 лістапада – гэта найперш сьвята міру”.

Выступае віцяблянін Арцём

Кіраўнік Віцебскай абласной арганізацыі партыі левых «Справядлівы сьвет» Мікалай Селівашка паведаміў у сваёй прамове, што напярэдадні сьвята партыя ў чарговы раз падавала заяўку на правядзеньне мітынгу каля помніка Леніну 7 лістапада, але дазвол на правядзеньне масавага мерапрыемства ад уладаў зноў не атрымала (як і летась).

Падчас прамовы Мікалая Селівашкі

Сьвяточны сход каля помніку Леніну доўжыўся каля 40 хвілінаў. Пасьля яго заканчэньня ўдзельнікі дзяліліся ўражаньнямі, друкаванай прэсай і нават ласункамі.

Адзначым, што яшчэ год таму з помніка Леніну на аднайменнай плошчы ў Віцебску зьнікла шыльдачка з надпісам «Ахоўваецца дзяржавай». Шыльдачка дагэтуль не зьявілася.