«Выхаваўчае мерапрыемства»? Асобаў, якія стаяць на ўліку ў наваполацкай крымінальна-выканаўчай інспекцыі, накіравалі прыбіраць смецце
«Бясплатную працоўную сілу» выкарысталі для прыбокі смецца ў яры, які знаходзіцца ў раёне вуліц Васілеўцы і Дзянісава. «Выхаваўчае мерапрымства», як назвалі яго ў мясцовай міліцыі, праводзілася без інструктажу па тэхніцы бяспекі, з удзельнікамі добраўпарадкавання не заключалася ніякіх працоўных дамоваў. Начальнік крымінальна-выканаўчай інспекцыі Наваполацкага ГАУС Іван Шаляковіч называе прымусовую працу асобаў, якія стаяць на ўліку, «дадатковымі прафілактычнымі захадамі».
Жыхары пасёлка льнозавода ў Лёзне рызыкуюць застацца без святла і вады
Такая рызыка існуе штодня, бо электрасеткі ў пасёлку належыць прадпрыемству-банкруту. «Яны даўно ўжо ў аварыйным стане, пры ветры часта бывае замыканне, і мы застаемся без электрычнасці, -- скардзяцца жыхары вуліц Кірава, Партызанскай, Гагарына. -- У працоўныя дні на заводзе нехта яшчэ можа ліквідаваць замыканне. А ў выходныя дні – бяда». Бо работнікі раённых службаў «ведамаснымі» праблемамі не займаюцца.
Бацькі просяць адмяніць будаўніцтва 16-павярховага дома пад вокнамі віцебскай СШ №45
Першы аргумент: гмах пад вокнамі істотна зменшыць узровень асвятлення ў класах. Другі аргумент: некалі на гэтым месцы абяцалі пабудаваць дзіцячы садок, але гэтае абяцанне засталося нявыкананым, хаця неабходнасць у дашкольнай дзіцячай установе для жыхароў вуліцы Чкалава па-ранейшаму актуальная.
Многія дзіцячыя пляцоўкі на Віцебшчыне – месца небяспекі
Пракуратура Віцебскай вобласці запатрабавала ліквідаваць недахопы, а іх знайшлося нямала: пашкоджанні і незамацаванае абсталяванне на гульнявых пляцоўках, пясочніцы без пяску, смецце і зараснікі хмызнякоў у зонах, прызначаных для дзіцячых гульняў. Праінспектаваць дзіцячыя пляцоўкі органы пракуратуры змусілі вельмі скрушныя акалічнасці: у вобласці сёлета значна падвысілася дзіцячая смяротнасць ад знешніх прычынаў.
Жыхары «вёскі будучыні» просяць зрабіць зручны падход для мясцовай амбулаторыі
Аграгарадок Мазалава ў Віцебскім раёне – паказальны. У тым сэнсе, што туды возяць розныя дэлегацыі, каб пахваліцца ўмовамі, створанымі для вяскоўцаў. Там ёсць школа, дзіцячы садок, Дом культуры і нават Цэнтр прыгажосці з цырульняй і трэнажорным залам, аптэка, амбулаторыя... Але дабрацца да апошняй – праблема, асабліва для пажылых людзей.
На наваполацкім тэлеканале «Звязда» пракурор горада распавёў пра абвінавачанне палітвязня
Старшы памочнік пракурора г. Наваполацка Сяргей Шынкевіч афіцыйна паведаміў, за што асудзілі Дзмітрыя Шалака. Прадстаўнік пракуратуры ўдакладніў, што прысуд, вынесены 8 жніўня суддзёй Наваполацкага гарадскога суда Таццянай Хрыпач, асуджаны не абскарджваў. Яго прызналі вінаватым паводле ч. 1 арт.368 КК (Абраза прэзідэнта Рэспублікі Беларусь) і паводле арт.369 КК (Абраза прадстаўніка ўлады). Дзмітрыя Шалака асудзілі да трох з паловай гадоў пазбаўлення волі з адбываннем пакарання ў папраўчай калоніі ва ўмовах агульнага рэжыму і да штрафу памерам 200 базавых велічыняў (8 тысяч рублёў).
Аршанская «раёнка» не мае што сказаць чытачам пра дзейнасць дэпутатаў
У апошнія дні верасня прайшло пасяджэнне 8-й сесіі аршанскага райсавета дэпутатаў. У артыкуле, які выйшаў па выніках мерапрыемства ў «Аршанскай газеце», - ні слова канкрэтыкі пра дзейнасць дэпутатаў. Толькі прапагандысцкія фразы і ідэалагічныя шаблоны. Жыхарам рэгіёна так і не стала больш зразумела, чым займаюцца «народныя абраннікі». А тым болей – за што атрымліваюць узнагароды.
На гэтым тыдні на Віцебшчыне прайшлі 10 судоў па «палітычных» адміністрацыйных справах
Гэта статыстычныя звесткі, якія базуюцца на дадзеных з адкрытых крыніц. Але вядома, што шмат якія суды за «распаўсюд экстрэмізму» і «пікетаванне ў інтэрнэце» праходзяць «явачным парадкам» - калі людзей затрымліваюць і судзяць цягам 72 гадзін. Вельмі часта такія працэсы не трапляюць у расклады працы судоў на сайце электроннага судаводства.
За 3,3 мільёны рублёў у Віцебску прадалі будынкі, дзе мясціўся РАУС Кастрычніцкага раёна
Купіць падчас аўкцыёну некалькі будынкаў на вуліцы Суворава выказаў жаданне адзін чалавек. Яго асабістыя дадзеныя не раскрываюцца, вядома толькі, што ён – ураджэнец Віцебска, які цяпер жыве ў Мінску. Не раскрываецца і тое, якія планы мае на комплекс будынкаў у гістарычным цэнтры новы ўладальнік. 2 будынкі з сямі маюць статус гісторыка-культурнай каштоўнасці і адпаведна, павінны быць адрэстаўраваны і перапрафіляваны ў адпаведнасці з ахоўным заканадаўствам.
Міліцыя з усёй вобласці і фільтрацыйныя пункты. Сёння ў Бешанковічах стартуюць абласныя «Дажынкі-2024»
27 верасня сітуацыя ў райцэнтры нагадвае рэжым вайсковага ці надзвычайнага становішча: міліцыю перавялі на ўзмоцнены варыянт нясення службы. Для « каардынавання ўсіх сіл і сродкаў, якія знаходзяцца ў пасёлку», працуе аператыўна-сітуацыйны штаб. Каля галоўнай сцэны створана «рэжымна-абмежавальная зона», а для «зручнасці» мясцовых жыхароў і гасцей «працуюць 5 фільтрацыйных пунктаў». Вось толькі на добраўпарадкаванне Бешанковічаў выдаткавана няшмат.