«Слова ўзяў Уладзімер Цярэнцьеў, старшыня аблсавету, і ў гэтыя 6 мінут 40 сэкунд не было сказана аніводнага добрага слова, затое гучалі абразьлівыя выразы, паведамлялася непраўдзівая інфармацыя, і ўсе мае дзелавыя і маральныя якасьці былі аблітыя чорнай фарбай», – тлумачыць Павал Левінаў.
Праваабаронца паспрабаваў абскардзіць рашэньне наконт фармаваньня абласной выбарчай камісіі ў Віцебскім абласным судзе. Але суд у асобе Натальлі Хількевіч ягоную скаргу не задаволіў.
Паводле Левінава, абласны суд не разабраў ягоную скаргу па сутнасьці: у ёй вялося пра дыскрымінацыйны падыход да аднаго з прэтэндэнтаў, а ў пастанове прагучала, што парушэньняў заканадаўства не было і што зацьверджаны склад камісіі адпавядае ўсім адпаведным патрабаваньням.
Летась праваабаронца ўжо меў досьвед працы ў абласной выбарчай камісіі, якая працавала падчас мінулых парлямэнцкіх выбараў. Сёлета сытуацыя зьмянілася.
«Левінаў для ўладаў рэальна небясьпечны. Ён праваабаронца, які адстойвае правы грамадзянаў, сочыць за выкананьнем закону. І калі раней улады маглі ўключыць яго ў камісію ў якасьці гульні, то цяпер, калі ўлада захісталася, такія элемэнты катэгарычна мусяць быць выключаныя са складу камісіі», – лічыць актывіст Алег Паўлаў, які прысутнічаў на судзе.
Выбарчым заканадаўствам прадугледжаная магчымасьць абскардзіць рашэньне пра фармаваньне камісій праз суд. Але ў Беларусі яшчэ не было такіх выпадкаў, каб суд прызнаў дзеяньні прадстаўнікоў уладаў незаконнымі і каб камісіі былі расфармаваныя і сфармаваныя наноў.
Камэнтуйце гэтую навіну на нашай старонцы ў facebook!