Святлану Стукаву, жонку актывіста Свабоднага Прафсаюзу Беларускага Віктара Стукава, затрымалі заўчора проста на працы. У райаддзеле міліцыі на яе склалі два адміністрацыйныя пратаколы – за нібыта несанкцыянаванае пікетаванне паводле арт 24.23 і за распаўсюд экстрэмісцкіх матэрыялаў паводле ч.2 арт. 19.11. Праўда, вінаватасць жанчыны ў пікетаванні міліцыянты не спадзяваліся давесці, і таму ў суд трапіў толькі адзін пратакол. На думку Віктара Стукава, абвінавачанне жонкі ў распаўсюдзе экстрэмісцкіх матэрыялаў беспадстаўнае, і міліцэйскі пераслед ён лічыць помстай за актыўнасць у недзяржаўным прафсаюзе і за выразную грамадзянскую пазіцыю.

На працягу лютага ў спіс экстрэмісцкіх матэрыялаў былі дададзены больш як дзясятак розных інфармацыйных рэсурсаў, якія маюць дачыненне да Віцебшчыны – яны або створаны ў Віцебскай вобласці, або мясцовыя суды вынеслі пастановы папаўненне спісу.

Былому палітвязню спынілі рэжым прэвентыўнага нагляду, які 1,5 гады ажыццяўлялі супрацоўнікі міліцыі. Такое рашэнне 20 лютага ў судзе Кастрычніцкага раёну Віцебска прыняў суддзя Ілля Белавус.

У Гомельскім абласным судзе абвясцілі вырак абвінавачаным па крымінальнай справе «Рабочага руху» – 10-ці прадстаўнікам прадпрыемстваў «Нафтан», «Гродна Азот», БМЗ, «Атлант», беларускай чыгункі. Сярод асуджаных – былыя юрысконсульты ААТ «Нафтан» Аляксандр Капшуль і Ігар Мінц. Абодвух прызналі вінаватымі ў «здрадзе дзяржаве» і «стварэнні экстрэмісцкага фармавання і ўдзеле ў ім». Ігар Мінц, як і астатнія 9 фігурантаў справы, не прызнаў у гэтым сваёй віны. Суддзя Аляксандр Піскуноў асудзіў Мінца да 12 гадоў пазбаўлення волі ў калоніі ўзмоцненага рэжыму.