На судовым паседжаньні прысутнічалі многія грамадзкія актывісты Полацкага рэгіёну. Падтрымаць Аляксея прыйшлі актывісты партыі «Беларуская сацыял-дэмакратычная партыя» (Грамада) і аргкамітэту па стварэньні партыі «Беларуская хрысьціянская дэмакратыя». Вялікая заля суду Наваполацку была практычна цалкам запоўненая.

Аляксей Жаўноў адбывае пакараньне ў папраўчай установе адкрытага тыпу № 15, якая знаходзіцца ў Наваполацку, і працуе дворнікам на тэрыторыі ЛПП. Інцыдэнт адбыўся 4 лютага, калі ён зайшоў у аддзел кадраў ЛПП па даведку пра заробак. У калідоры адміністрацыйнага будынку Аляксей сутыкнуўся з намесьнікам начальніка ЛПП № 8 Яўгенам Гуцулам, і паміж імі адбылася слоўная сварка.

Яўген Гуцул сьцьвярджаў у судзе, што Аляксей паслаў яго на тры літары і абразіў, ужываючы ненарматыўную лексыку. Гэта ж сьцьвярджалі і выпадковыя сьведкі падзеі – работнікі ЛПП, якія па службе залежныя ад намесьніка начальніка гэтай установы. Усяго сьведак было трое: дзьве жанчыны і мужчына. Калі жанчыны саромеліся агучыць мацернае слова, прамоўленае Аляксеем, то работнік гаспадарчай часткі ЛПП Валюшкін назваў яго: Аляксей нібыта абазваў Гуцула словам, сугучным са словам «кандом». Жаўноў адкінуў гэтае абвінавачаньне і заявіў, што нічога падобнага ён не казаў.

Абаронцам Аляксея ў судовым працэсе выступіў ягоны бацька Алег Жаўноў. Пасьля апытаньня сьведкаў бацька заявіў хадайніцтва пра далучэньне да матэрыялаў справы дыска з аўдыёзапісам канфліктнай падзеі. Запіс гутаркі працягласьцю каля 10 хвілін, зроблены на дыктафон мабільнага тэлефону самім Аляксеем, быў праслуханы. Пры канцы запісу чутная перапалка Аляксея з намесьнікам начальніка, але ніводнага нецэнзурнага слова з вуснаў Аляксея не прагучала. Тым ня менш, далучыўшы аўдыёзапіс да матэрыялаў справы, судзьдзя Балаболава адмовілася прызнаць яго ў якасьці рэчыўнага доказу невінаватасьці Аляксея Жаўнова. Такое сваё рашэньне ў залі суду яна нічым не матывавала.

Такім чынам, суд Наваполацку вынес сябру апазыцыйнай партыі пакараньне ў выглядзе штрафу ў памеры 25 базавых велічынь, што складае 5 250 000 беларускіх рублёў. Паводле артыкулу 23.5 КаАП максымальна дапушчальны штраф роўны 50-ці базавым велічыням.

Ёсьць яшчэ дзесяць дзён на абскарджаньне рашэньня суду. Аляксей Жаўноў і ягоны бацька маюць намер далей дамагацца справядлівасьці, і спадзяюцца на скасаваньне рашэньня суду гораду Наваполацку.

Аляксандар Марозаў