У гэтым годзе конкурс чытальнікаў атрымаўся кулуарным і ў пэўным сэнсе засакрэчаным. Умовы для ўдзельнікаў не публікаваліся ні ў СМІ, ні на сайце райвыканкама. БРСМаўцы пайшлі па традыцыйным шляху: даслалі разнарадкі па школах і навучальных установах. Адпаведна, далёка не ўсе аматары творчасці Уладзіміра Караткевіча, гатовыя паспаборнічаць у дэкламаванні ягоных твораў, змаглі даведацца пра такую магчымасць.

У выніку конкурс атрымаўся выключна для моладзі ад 14 да 30 год, і журы атрымала ўсяго 49 відэазапісаў ад удзельнікаў –  спаборніцтва правоводзілі завочна, разглядаючы запісаныя чытальнікамі відэаролікі.

Усе папярэднія гады запрашэнні да ўдзелу у конкурсе былі публічныя. І канкурсантаў было значна болей.

21 лістапада Аршанскі музей Уладзіміра Караткевіча запрашае на цырымонію ўзнагароджання пераможцаў конкурсу чытальнікаў. Але ў афішы мерапрыемства ў сацсетках музея чытальнікаў чамусьці назвалі “чытачамі”.  Вось і прыклад сапраўднага стаўлення да мовы з боку арганізатараў з БРСМ.

Ігар Казіміраў