У Талачыне супраць школьніка- старшакласніка распачалі крымінальную справу за тое, што ён “замініраваў” мясцовы РАУС. З паведамленнем аб "мініраванні" падлетак патэлефанаваў па нумары 102 прама са школы. Каб адшукаць "мінёра", спатрэбілася ўсяго пару гадзін: яго забралі на допыт проста з заняткаў. Свае дзеянні хлопец патлумачыў жаданнем" пажартаваць " і павесяліць сваіх сяброў.

Цяпер “жартаўніку” пагражвае пакаранне паводле ч. 1 артыкула 340 Крымінальнага кодэкса Рэспублікі Беларусь («Загадзя ілжывае паведамленне аб небяспецы»). Ен ужо дасягнуў узросту крымінальная адказнасці, але яшчэ з’яўляецца непоўнагадовым. Таму  замест крымінальнага пакарання суд можа вынесці абвінаваўчы прысуд з прымяненнем прымусовых мер выхаваўчага характару.Самая лёгкая з іх - гэта папярэджанне з тлумачэннем наступстваў паўторнага здзяйснення злачынства, самая сур'ёзная - змяшчэнне ў спецыяльную выхаваўчую ўстанову на тэрмін да двух гадоў.

У Лёзне “адзначыліся” двое шасцікласнікаў. Камісія па справах непоўнагадовых прыняла да разгляду пра тое, што хлопцы лаяліся, ужываючы нецэнзурную лексіку, прычым проста ў школе.

Паколькі дзеці не дасягнулі ўзросту адміністрацыйнай адказнасці, пакаранне пагражае іхным бацькам. І не толькі за хуліганства. Камісія будзе вывучаць умовы пражывання малалетніх парушальнікаў грамадскага парадку і фактары, якія маглі прывесці да інцыдэнту. Зрэшты, камісія можа пашкадаваць школьнікаў і абмежавацца выхаваўчай гутаркай з пастаноўкай на ўлік.

У школе імя М.Акцябрскай, дзе навучаюцца юныя “мацюкальшчыкі”, рэгулярна праводзяцца рознага кшталту ідэалагічна -патрыятычныя мерапрыемствы. Гэта калі меркаваць па артыкулах-справаздачах у раённай газеце. Добра б яшчэ вучылі элементарнаму “што такое “добра” і што такое “кепска”.

Святлана Пугач