Іосіф Дулеба быў двойчы згаданы як удзельнік “экстрэмісцкіх фармаванняў” - праектаў " FreeInfoBel" і «Білорусь 2.0 Робімо Разам». 25 чэрвеня мінулага года ў «Пералік арганізацый, фармаванняў, індывідуальных прадпрымальнікаў, датычных да экстрэмісцкай дзейнасці» была ўнесена  грамадская арганізацыя, зарэгістраваная ва Ўкраіне пад назвай «Громадська організація «Білорусь 2.0 Робімо Разам». У складзе групы грамадзян, якія нібыта здзяйснялі «экстрэмісцкую дзейнасць», было згадана  і прозвішча Іосіфа Дулебы. Яшчэ раней, 3 мая мінулага года, ягонае імя з'явілася ў спісе МУС у складзе «экстрэмісцкага фармавання «FreeInfoBel». А праз 4 дні ён быў затрыманы.

Затрыманне адбылося знянацку- проста на вуліцы. Дома ў Іосіфа Дулебы правялі ператрус, забралі аргтэхніку і спачатку змясцілі ў ІЧУ, прысудзіўшы 15 сутак арышту  паводле ч.2 арт. 19.11 КаАП. Але на волю ён не выйшаў: мужчыне прад'явілі крымінальнае абвінавачванне, звязанае з удзелам у дзейнасці экстрэмісцкага фармавання, і перавялі ў СІЗА.

Вядома, што пасля падзеяў 2020г. Іосіф Дулеба на некаторы час з'язджаў ва Ўкраіну, але потым вярнуўся ў Беларусь, хаця сябры яму раілі гэтага не рабіць.У Віцебску Іосіфа (Язэпа) Дулебу многія памятаюць і як актывіста Беларускага Народнага Фронта, у 1990-я ён кіраваў віцебскай гарадской арганізацыяй БНФ. У пачатку 2000-х адышоў ад актыўнай палітычнай дзейнасці, але заўсёды цікавіўся палітыкай, каментаваў у сацыяльных сетках значныя грамадскія падзеі, шмат камунікаваў з вядомымі ў Беларусі асобамі. 

Міхаіл Латунны