Аляксандр — актывіст анархісцкага руху і фігурант справы "Рэвалюцыйнага дзеяння". Палітвязня прызналі вінаватым па 14-ці  крымінальных артыкулах, у тым ліку ч. 1 арт. 293 Крымінальнага кодэкса — Арганізацыя масавых беспарадкаў, ч. 3 арт. 293 Крымінальнага кодэкса — Навучанне ці іншая падрыхтоўка асоб для ўдзелу ў масавых беспарадках, альбо фінансаванне гэтай дзейнасці, арт. 342 Крымінальнага кодэкса — Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх.

Аляксандр Францкевіч быў затрыманы 13 жніўня 2020 года. Суд над ім распачаўся 25 красавіка 2022 года ў Мінскім гарадскім судзе і працягваўся 4 з паловай месяцы. Францкевіч абскардзіў прысуд, вынесены суддзём Сяргеем Храпчам, і пасля разгляду яго скаргі Вярхоўны суд пастанавіў пакараць актывіста  зняволеннем на  16 гадоў і 9 месяцаў у калоніі ва ўмовах строгага рэжыму. Таксама поводле судовага рашэння яго заабавязалі выплаціць штраф памерам 22 400 беларускіх рублёў.

З верасня 2023 года Аляксандра Францкевіча некалькі разоў пераводзілі ў розныя месцы зняволення.  Спачатку ён адбываў тэрмін у івацэвіцкай калоніі № 5, але пазней яго перавялі ў ваўкавыскую ПК-11. Там з верасня 2023 года Аляксандра змясцілі ў ПКТ на паўгода,  неаднаразова змяшчалі ў ШІЗА, і  кіраўніцтва  калоніі распачала супраць яго ў  крымінальную справу паводле арт. 411 КК за “злоснае непадпарадкаванне”.   Суддзя суда Ваўкавысскага раёна Мікалай Сяргейка прызначыў палітвязню  яшчэ адзін год зняволення. Адбываць далейшы тэрмін  Аляксандра Францкевіча перавялі ў аршанскую калонію № 8. Адміністрацыя і гэтай калоніі цяпер ініцыявала справу паводле арт. 411 КК .

Адначасова з Аляксандрам Францкевічам на Віцебшчыне судзяць яго маці. Таццяну Францкевіч вінавацяць  у "садзейнічанні экстрэмісцкай дзейнасці" паводле арт. 361-4 Крымінальнага кодэксу. Яе справу разглядаюць у Віцебскім абласным судзе.

Ларыса Трыфанава