Пра высечку дрэваў у “Білеве-3” паведаміў у сацсетках адзін з жыхароў мікрараёну.
Побач – пустое поле
“У нашай сацыяльна-арыентаванай дзяржаве, як заўжды, не пацікавіўшыся нічыім меркаваньнем, пачалі чарговую высечку дрэваў. У раёне “Білева-3” сабраліся будаваць чарговую АЗС і аўтамыйню. Адбываецца гэта насупраць шматкватэрнага жылога дому. А літаральна празь 50 мэтраў знаходзіцца нікому не патрэбнае поле. Але навошта ж будаваць на пустцы, калі можна высечы паўсотню дрэваў?..” – напісаў віцяблянін Дзяніс.
Месца высечкі
Удакладняе, што дрэвы пілавалі ўвечары ў пятніцу, перад вялікімі выходнымі, “калі ўсе нашыя начальнікі, што “думаюць аб людзях”, ужо звалілі з працы”. “А гарачыя ліні толькі адфутбольваюць, маўляў, прыходзьце ў сераду і запісвайцеся на прыём. Але да серады ад гэтага лесу ўжо нічога не застанецца…” – дадае карыстальнік.
Мяркуючы па ўсім, высечаны ўчастак ад пятніцы не павялічыўся. Сьпілаваныя дрэвы складзеныя на ўскрайку дзялянкі. Частка зь іх – расьпілаваная.
Трапілі пад сякеру і маладыя дубкі
На жаль, высьветліць, ці гэтая высечка санкцыянаваная, у панядзелак 2 ліпеня нам не ўдалося.
Што пішуць у камэнтарах
“Людзям спачатку прапануюць варыянты на выбар жыльля… І менавіта блізкасьць лесу шмат для каго вызначальная. А цяпер гэтых людзей папросту “кідаюць”, прадаўшы ім “мэтры ля лесу”, а потым, замест лесу, паставіўшы ім пад вокнамі неэкалягічныя АЗС і аўтамыйні…” – піша ў камэнтары да паведамленьня карыстальнік Яўген.
“Там больш аптымальна глядзеўся б парк для адпачынку людзей, цягнуўся б аж да заапарку. Але нашыя чынушы, як звычайна, награваюць сабе кішэні. Вунь, вуліца Іваноўскага стаіць бяз лесу – хоць забудуйся, дык дзе ж там. Абавязкова трэба насупраць жылога дому пабудаваць, каб горш людзям было, дабіваць іх спакваля, каб да пэнсіі не дажывалі”, – мяркуе карыстальнік пад нікам “Іван Пятроў”.
“За такую нелягічную высечку лесу трэба вінаватых прыцягваць да адказнасьці і караць. Каб іх штрафанулі па поўнай! Побач пустка стаіць, а яны лес сякуць! Штосьці тут нячыста…” – піша яшчэ адзін віцяблянін Яўген.
Віцебскі мікрараён "Білева-3". Дрэвы высеклі насупраць гэтых дамоў
Але ёсьць сярод камэнтатараў і тыя, хто мяркуе, што падобная высечка – натуральная справа для горада, які разбудоўваецца. І што лес пад Білевам усё адно “асуджаны на пілу і сякеру”.
Зьміцер Міраш, фота аўтара
