Фотаздымак дакумента, дасланага з міліцыі, актывіст размясціў на сваёй старонцы ў Фэйсбуку. Ен адзначае, што пра пачатак адміністрацыйнай справы яму не паведамлялі. Таму ён не дужа разумее, што адбываецца. Фізічна парушыць заканадаўства аб масавых мерапрыемствах у Віцебску мужчына аніяк не мог, бо ўжо даўно адтуль з’ехаў. Калі ж вядзецца пра “пікетаванне ў сацсетках”, то міліцыянты распачыналі б “адміністратыўку” па канкрэтным факце, і тады не было б гаворкі пра адсутнасць складу правапарушэння...
Адна з версій Дзмітрыя Карняенкі - што яго спрабуюць самым наіўным чынам “завабіць” у Віцебск, бо ў дакуменце пазначана: "с делом Вы можете ознакомиться в Железнодорожном РОВД”. Гэтую спробу інакш як наіўнай назваць цяжка, бо ў Беларусі на актывіста заведзена крымінальная справа, ен прызнаны ўдзельнікам двух “экстрэмісцкіх фармаванняў”, і ехаць на Радзіму, каб трапіць у турму, ен не збіраецца.
Яшчэ адна верагоднасць - што адміністрацыйную справу ў Чыгуначным РАУС на Дзмітрыя Карняенку завялі па чыёйсці скарзе. Прасцей кажучы, нехта вырашыў яго беспадстаўна “закласці”, і матывам можа быць нават банальная помста.
Справа ў тым, што не так даўно Дзмітрый Карняенка звярнуўся ў міліцыю з заявамі пра тое, што супрацоўнікі МУС вельмі выбарачна прымяняюць ч.2 арт.19.11 КаАП. Пад суд з наступнымі пакараннямі трапляюць шэраговыя беларусы, тады як у сацсетках “недатыкальных асобаў” таксама сустракаюцца спасылкі на так званыя “экстрэмісцкія інфармацыйныя рэсурсы”. У ліку такіх асобаў - жонка старшыні аблвыканкама, кіраўніца праўладнага пісьменніцкага саюзу, дырэктарка абласнога краязнаўчага музея...
У адказе на зварот гаварылася, што па фактах, згаданых Дзмітрыем, будзе праведзена праверка. І некаторыя асобы насамрэч былі пакараныя. Магчыма, нехта з “пакрыўджаных” вырашыў расквітацца за актывістам падобным чынам.
Да слова, не падобна, каб “недатыкальных” асобаў, названых Дзмітрыем Карняенкам, сапраўды пакаралі “за распаўсюд экстрэмізму”. Бо, напрыклад, на старонцы ў Фэйсбуку дырэктаркі Віцебскага краязнаўчага музея Таццяны Старынскай і дагэтуль ва ўпадабаных можна ўбачыць згадкі “экстрэмісцкіх фармаванняў” “Радыё Свабода” і “Зеркало. Новости”.
Петр Канстанцінаў