Чым у гэтым сэнсе хваліліся гаспадары сустрэчы, паведаміла абласная газета «Витебские вести». Кіраўніца галоўнага ўпраўлення ідэалагічнай работы і па справах моладзі Марына Навіцкая распавяла прысутным, што газета «Патрыёт» мае адну з самых высокіх падпісак у Беларусі – 225 экзэмпляраў на 1000 насельніцтва.
Калі ж казаць пра лічбавую інфармацыю, то «раёнка» мае сайт, дзе фіксуецца колькасць праглядаў розных артыкулаў. З гэтых лічбаў вынікае, што асобныя артыкулы, асабліва з афіцыйнымі агульнабеларускімі навінамі, праглядаюць у сярэднім менш за 100 чалавек, а найбольш папулярнымі з'яўляюцца матэрыялы пра мясцовыя падзеі з фотаздымкамі. Але і яны набіраюць не больш за 400 праглядаў.
Ёсць у газеты «Патрыёт» свой Тэлеграм-канал, на яго падпісаны 1,7 тыс. чалавек. Ен дублюе газетныя паведамленні. Ёсць Youtube-канал, дзе ўсяго 265 падпісчыкаў і 67 відэа. Ёсць і старонка ў Instagram – бадай што, самы папулярны рэсурс, дзе 2 113 падпісчыкаў. Тады як насельніцтва Вушаччыны – гэта 11 732 чалавек (паводле дадзеных на 1 студзеня 2023 г.)
Галоўныя рэдактары мясцовых газет падзяліліся з калегамі сваімі галоўнымідасягненнямі. Галоўная рэдактарка газеты «Голас Расоншчыны», пракладам, распавяла досвед развіцця «раённага Тэлеграм-канала». Уласна газета свайго рэсурса ў гэтым мэсэнджары не мае. Але мае групу «ВКонтакте» і старонку ў Instagram, дзе апошняя публікацыя з'яўлялася 5 тыдняў таму.
Рэдактар газеты «Веснік Глыбоччыны» Андрэй Панкрат распавёў пра ўзаемадзеянне з уладамі, якое «садзейнічае вострых пытанняў, якія ўздамаюцца на старонках рэгіянальных СМІ». Да слова, сёлета рэдактар глыбоцкай «раёнкі» быў прызнаны адным з пераможцаў конкурса «Залатая ліцера» за праект «Мнение». Гэта ў асноўным ягоныя аўтарскія разважанні на палітычныя тэмы – пра тое, як цудоўна жыць у Беларусі і як дрэнна за мяжой, дзе "беглые занимаются формированием вооружённых подразделений" у той час як у Беларусі стварылі "мірную" ваенную дактрыну, і гэтак далей.
Станоўчы адзначыў дынаміку развіцця рэгіянальных СМІ Віцебшчыны старшы выкладчык кафедры перыядычнага друку і веб-журналістыкі БДУ Дзмітрый Сіняўскі. А Памочнік прэзідэнта – інспектар па Віцебскай вобласці Сяргей Ляўковіч «падкрэсліў асаблівую ролю СМІ ў забеспячэнні інфармацыйнага суверэнітэту і бяспекі краіны».
Сёлета, як і ў ранейшыя гады, на «лятучцы» ніякім чынам не аналізавалася зваротная сувязь з чытачамі, не аналізавалася, наколькі яны задаволеныя кантэнтам рэгіянальных СМІ і якія маюць прапановы для рэалізацыі на старонках «раёнак» на адпаведных інтэрнэт- рэсурсах.
Для рэдактараў правялі і прэс-тур па Вушацкім раёне. Калі меркаваць па фотарэпартажы ў газеце «Патрыёт», гасцей раёна не звазілі ні на малую радзіму Васіля Быкава, ні на алею славутых землякоў у райцэнтры, ні на магілу Рыгора Барадуліна, пахаванага ў Вушачах.
Лідзія Перамётава