Месца працы дзяўчыны – Аршанскі льнокамбінат. Паводле яе паказанняў, кубак яна набыла ў краме, і таму не лічыла, што ён можа быць прадметам правапарушэння. Разам з ёй у пакоі працуюць 15 чалавек. Адмыслова свой уласны посуд яна нікому не дэманстравала, але навакольныя маглі заўважыць, што на напоўненым гарачай вадкасцю кубку праступае выява «Пагоні» і лозунг «Жыве Беларусь». Падобна, што работніцу льнокамбіната «здаў» нехта з калегаў: у адміністрацыйнай справе фігуруюць фотаздымкі, на якіх дзяўчына пазнала і сябе, і свой тэрмакубак.

31 траўня дзяўчыну затрымалі супрацоўнікі ГУБАЗіКа, 1 чэрвеня адбыўся суд. Паколькі адпаведнай заявы ў выканкам па дазвол на правядзенне пікетавання не падавалася, суд палічыў, што работніца Аршанскага льнокамбіната правяла несанкцыянаваную масавую акцыю ў асяродку супрацоўнікаў. Паводле артыкула 24.23 КаАП дзяўчыну пакаралі арыштам на трое сутак. «Кубак з выявай герба П. і надпісам Ж.» суд пастанавіў знішчыць.

Юрка Жмых