У судзе Савецкага раёна Мінска 2 лістапада вынесены прысуд па крымінальнай справе ў дачыненні да афіцыянта Ігара Каранеўскага. Яго абвінавацілі у арганізацыі і падрыхтоўцы дзеянняў, якія груба парушаюць грамадскі парадак, альбо актыўны ўдзел у іх (арт. 342 КК РБ).

Справу разглядаў суддзя Аляксандр Якунчыхін, дзяржабвінаваўца – пракурор Рабаў.

З 14 верасня 2021 года Каранеўскі быў змешчаны пад варту ў СІЗА.

Па матэрыялах абвінавачвання, Каранеўскі ў перыяд часу з 16-00 да 22-00 9 жніўня 2020 года, знаходзіўся на праспекце Пераможцаў і Машэрава паблізу дамоў 41, 43, 45, груба парушаў грамадскі парадак. Прымаў актыўны ўдзел у несанкцыянаваным масавым мерапрыемстве з групай неўстаноўленых асоб. Публічна выкрыкваў лозунгі, здзяйсняў воплескі, адмовіўся выканаць распараджэння супрацоўнікаў органаў улады. Блакаваў дарогу, чым выклікаў перашкоды ў працы грамадскага транспарту.

Хворага афіцыянта судзяць за счэпку 9 жніўня мінулага года

Паводле допыту Каранеўскага, 9 жніўня ён у 15 гадзін пайшоў на галасаванне, затым зайшоў у кафэ на Ціміразева са знаёмым, папілі гарбату, пайшлі да “Кароны”. У раёне 19 гадзін вечара заўважыў паток людзей.

Пракурор запрасіў для Каранеўскага тры гады абмежавання волі без накіравання ва ўстанову адкрытага тыпу “хатняя хімія”.

Адвакат са свайго боку перакананы, што абвінавачванне неабгрунтаванае і шмат у чым заснаванае на домыслах, сумневах і непацверджанай інфармацыі.

Апроч гэтага Каранеўскі мае некалькі захворванняў, у яго змены ў паяснічных аддзелах пазваночніка, ён знаходзіўся на стацыянарным лячэнні з 17 па 21 верасня з дыягназам - гіпертэнзія.

Тым не меней суддзя Якунчыхін прызнаў Каранеўскага вінаватым і пакараў абмежаваннем волі без накіравання ва ўстанову адкрытага тыпу тэрмінам на тры гады.

Крыніца: Трымя гадамі "хатняй хіміі" пакаралі мінчука за ўдзел у масавым мерапрыемстве 9 жніўня мінулага года