Журналісткі Марына Драбышэўская і Ларыса Шчыракова, якія супрацоўнічаюць з Белсатам, былі затрыманыя ў Гомелі пасля санкцыянаванага мітынгу 1 траўня. Падставы затрымання ім не тлумачылі.

Яшчэ раніцай Марына Драбышэўская паведамляла пра тое, што за яе кватэрай вялося вонкавае назіранне, аднак ёй удалося пазбегнуць затрымання. На мітынгу журналістка вяла стрым.

«Мы ішлі разам пасля мітынгу, – кажа адзін з удзельнікаў акцыі Андрэй. – Марына меркавала, што яе могуць затрымаць. За кінатэатрам “Юбілейны” да нас падʼехаў міліцэйскі УАЗік, адтуль выйшлі два супрацоўніки. Адзін з іх прадставіўся як старэйшы лейтэнант Шуляк і запрасіў Марыну праехаць з імі».

Падставу для затрымання Драбышэўскай не патлумачылі. Зараз журналістка знаходзіцца ў Чыгуначным РАУСе.

Ларыса Шчыракова, якая таксама вяла стрым на акцыі. У інтэрвʼю Белсату яна паведаміла, што, калі ўжо сыходзіла з мітынгу, да яе падʼехала міліцэйская машына, адтуль выскачылі два супрацоўнікі і зацягнулі яе ў аўто. Падчас затрымання супрацоўнікі міліцыі не прадставіліся і нічога не патлумачылі Шчыраковай.

Журналістка правяла больш за гадзіну ў Чыгуначным РАУСе, дзе на яе быў складзены пратакол па арт. 22.9 КаАП «Парушэнне заканадаўства аб сродках масавай інфармацыі».

Нагадаем, што ў нядзелю ў Гомелі быў затрыманы таксама журналіст Яўген Меркіс. 2 траўня яго будуць судзіць нібыта за дробнае хуліганства.

Крыніца: У Гомелі пасля санкцыянаванага мітынгу былі затрыманыя журналісткі