У Сусветны дзень супраць смяротнага пакарання праваабаронцы разам з валанцёрамі выйшлі на вуліцы беларускіх гарадоў. Сваёй пачэснай місіяй яны імнкуцца данесці да людзей інфармацыю пра недарэчнасць і абсурднасць смяротнага пакарання, якое з усіх еўрапейскіх краін засталося толькі ў Беларусі. Тысячы тэматычных буклетаў “Шэсць аргументаў супраць смяротнага пакарання” атрымалі жыхары Мінска, Гомеля, Гародні, Баранавічаў, Рэчыцы, Светлагорска, Маладэчна і іншых гарадоў.

Мінск

Праваабарончы цэнтр “Вясна” разам з валанцёрскай службай, а таксама актывісты Асамблеі НДА правялі масавую інфармацыйную акцыю ў цэнтры сталіцы. Нягледзячы на восеньскае імжыстае надвор’е мінакі з цікаўнасцю знаёміліся з буклетамі, задавалі пытанні праваабаронцам, уступалі з імі ў палеміку.

Гародня

Праваабаронцы Уладзімір Хільмановіч, Раман Юргель, Эдвард Дмухоўскі і Віктар Сазонаў наведалі людныя месцы гораду і раздалі суайчыннікам тысячу буклетаў “Шэсць аргументаў супраць смяротнага пакарання”.

Яны наведалі рынкі гораду, людныя прыпынкі і паўсюдна, акрамя раздачы інфармацыйных матэрыялаў, праводзілі дыскусіі з гараджанамі. Галоўная выснова з гэтых дыскусій такая, што беларускае грамадства увогуле не інфармаванае на гэтую тэму. Таму матэрыялы і размовы праваабаронцаў успрымаліся з цікавасцю. Таксама з тых размоў зразумела, што не ўсе яшчэ гатовыя да поўнай адмены смяротнага пакарання. Дастаткова шмат яшчэ людзей, якія лічаць патрэбным захоўваць смяротнае пакаранне. Але галоўнае што людзі хочуць разважаць на гэтую тэму і патрабуюць такой інфармацыі.

Маладэчна

На Цэнтральным рынку горада 10 кастрычніка прайшла інфармацыйная акцыя супраць смяротнага пакарання. Яна была арганізаваная актывістамі мясцовых філій Ц "Вясна" і Беларускага Хельсінскага камітэта. Маладэчанцы цікавіліся буклетамі, ахвотна ўступалі ў палеміку з праваабаронцамі. Праўда, былі і такія, якія як ад полымя шарахаліся, падыходзілі і тыя, хто выказваўся за смяротнае пакаранне.  і прынцыпова не бралі ўлёткі. Многія, грунтуючы свай адмоўнае стаўленне да смяротнага пакарання, узгадвалі растрэл Канавалава і Кавалёва, у віноўнасць якіх людзі проста ня вераць.

Рэчыца

У Рэчыцы актывісты праваабарончага цэнтру “Вясна” і валанцёры прайшліся па найбольш людных месцах горада і раздалі жыхарам буклеты, дзе прыводзяцца шэсць аргументаў супраць смяротнага пакарання.

Як паведамляе rechyca.com , маладзёны, навучэнцы Рэчыцкага аграрнага каледжа, якія атрымалі буклет у краме “Еўраопт”, ідучы, разважалі пра тэму: “Не! Расстраляць – гэта не гуманна, ды й не спыняе ад злачынства. Хай бы ён усё жыццё ў камеры з гэтым жыў і пакутваў”.

“Я згодны, што смяротнае пакаранне трэба адмяніць. Але для аднаго чалавека яго, усё ж, патрэбна пакінуць. Бо за тое, што ён зрабіў, варта адказваць па-поўнай” – давялося пачуць ад спадара на рэчыцкім цэнтральным рынку. “А тым, чыімі рукамі ён цісне грамадства, варта прадугледзець пажыццёвае зняволенне” – дадаў сусед па гандлёвым месцы.

Жыхары Рэчыцы ў большасці сваёй падтрымлівалі тое, што расстрэльваць людзей – гэта дзікунства, якое варта спыніць. Але для таго, каб такія думкі пашыраліся, людзей варта прымушаць думаць аб ім. І менавіта на гэта скіраваныя мерапрыемствы Тыдня супраць смяротнага пакарання, які праходзіць зараз у Беларусі.

Днём раней Інфармацыйныя акцыі ў межах Тыдня супраць смяротнага пакарання адбыліся ў Гомелі, Баранавічах, Бярозе, Смаргоні, Светлагорску і іншых гарадах. 

Крыніца: Адзіным фронтам супраць смяротнай кары ў Беларусі Фота