Суд Цэнтральнага раёна Гомеля на 10 чэрвеня прызначыў разгляд адміністрацыйнай справы ў дачыненні да актывіста Віталя Смоліча.
Яго вінавацяць ва ўдзеле ў несанкцыянаваным масавым мерапрыемстве - акцыі падтрымкі Сяргея Ціханоўскага, якая прайшла яшчэ 7 траўня на плошчы Леніна.
Смоліч паведаміў праваабаронцу Леаніду Судаленку, што да 7 чэрвеня ён праходзіў курс лячэння ад арытміі ў лякарні. Лекары выявілі ў станоўчы тэст на каронавірус і ўжо назаўтра, 8 чэрвеня актывіста адправілі лячыцца дадому. У гэты ж дзень на свой мабільны Віталь атрымаў СМС-апавяшчэнне аб маючым адбыцца судзе.
"7 траўня я ўдзельнічаў у мірным сходзе ў падтрымку арыштаванага блогера Ціханоўскага. У той дзень міліцыя многіх затрымала, я ж проста перайшоў на адваротны бок дарогі. З адміністрацыйным пратаколам мяне ніхто не знаёміў, пра тое, што прызначаная палітычная расправа, я даведаўся з СМС», - цытуе словы Смоліча сайт “Гомельскай вясны”.
Нагадаем, за акцыю 7 траўня ў Гомелі ў падтрымку Сяргея Ціханоўскага ўжо пакараныя 10 жыхароў Гомельскага рэгіёну. Трое атрымалі па 15 сутак - Юрый Уласаў, Віталь Грыцкоў і Дзмітрый Лукомскі, астатнія былі аштрафаваныя.