Гарадзенец Аляксандр Горбач атрымаў афіцыйны адказ на сваю скаргу з Вярхоўнага Суда Рэспублікі Беларусь. Пра гэта паведамляе "Гарадзенская Вясна".
Як і прагназавалася, адказ за подпісам намесніка старшыні Вярхоўнага Суда Руслана Аніскевіча - звычайная бюракратычная адпіска. Ні на адзін з довадаў Горбача адказу не дадзена, Вярхоўны Суд пацвердзіў несправядлівы штраф, да якога быў асуджаны Аляксандар Горбач.
Аляксандр Горбач вядомы ў горадзе над Нёманам як перакананы антыфашыст. А парадокс яго судовай гісторыі заключаецца ў тым, што яго аштрафавалі за нібыта экстрэмізм i распаўсюджванне фашысцкай сімволікі.
Нагадаем, што яшчэ 20 лістапада 2018 года суддзя Кастрычніцкага раённага суда Валерый Шпак прысудзіў Горбача да вялікага штрафу: па артыкуле 17.10 КаАП - штраф 5 базавых велічынь, згодна з артыкулам 17.11, частка 2 - 25 базавых (усяго 30 базавых).
Паводле першага эпізоду адміністрацыйнай справы Горбач прызнаны вінаватым у размяшчэнні выявы з фашысцкай сімволікай. Аднак, на самай справе свастыка на тым малюнку выкідваецца якраз у сметнік і гэта яскрава пацвярджае антыфашысцкія погляды Горбача. Іншыя эпізоды размяшчэння на ўласнай старонцы Горбача ў сацсетцы Вконтакте датычацца абрэвіятур, якія таксама ніяк не могуць лічыцца экстрэмісцкімі.
У Гародні зноў штраф за рэпост
Не пагадзіўшыся з абсурднай пастановай, Аляксандр Горбач падаў касацыйную скаргу ў Гродзенскі абласны суд. Суддзя абласнога суда Васіль Скок доўга разглядаў скаргу, а ў выніку ўсё ж не змог адмяніць пастанову.
Пасля гэтага Аляксандр Горбач падаў наглядныя скаргі на імя старшыні Гродзенскага абласнога суда. Аднак яго старшыня Аляксандр Корзун не задаволіў скаргу.
Адмоўны адказ з Вярхоўнага Суда на скаргу яшчэ раз пацвярджае, што дамагчыся справядлівасці і законнасці ў судовым парадку на ўзроўні нацыянальных судовых структур практычна немагчыма.
Крыніца: Як з антыфашыста «зляпілі» распаўсюдніка фашысцкай сімволікі