Мінск, 18 студзеня 2019 г.

Рада ПЦ “Вясна”

Заява

Як стала вядома Праваабарончаму цэнтру “Вясна”, 16 студзеня 2019 г. у Брэсце супрацоўнікамі міліцыі быў затрыманы праваабаронца, сябра ПЦ “Вясна” Уладзімір Вялічкін.

Паводле папярэдняй інфармацыі ён абвінавачваецца ў здзяйсненні адміністратыўнага правапарушэння па арт. 23.34 КаАП Рэспублікі Беларусь (арганізацыя ці ўдзел у несанкцыянаваным масавым мерапрыемстве), а менавіта за нібыта ўдзел у мірным сходзе грамадзян, якія кожную суботу ў знак пратэста супраць будаўніцтва экалагічна шкоднага прадпрыемства па вырабу акумулятарных батарэй, выходзяць на цэнтральную плошчу горада і кормяць галубоў.

Уладзімір Вялічкін ажыцяўляў маніторынг рэалізацыі грамадзянамі свабодаў мірных сходаў і выказвання свайго меркавання, гарантаваных Канстытуцыяй краіны і міжнароднымі нормамі права ў галіне правоў чалавека, і ў сувязі з гэтым прысутнічаў на ўсіх мірных сходах, якія адбываюцца з гэтай нагоды ў горадзе.

Затрыманне міліцыяй Уладзіміра Вялічкіна з’яўляецца нічым іншым, як пераследам за ягоную праваабарончую дзейнасць.

У сувязі з гэтым мы, прадстаўнікі Праваабарончага цэнтру “Вясна”, выказваем рашучы пратэст і патрабуем ад уладаў Рэспублік Беларусь:

• неадкладна спыніць пераслед праваабронцы і сябра ПЦ “Вясна” Уладзіміра Вялічкіна ў сувязі з ажыцяўленнем ім легітымнай праваабарончай дзейнасці і зняць яго ўсе прад’яўленыя абвінавачванні;
• гарантаваць грамадзянам магчымасць рэалізаваць свае свабоды на мірныя сходы і выказванне свайго меркавання, у тым ліку і па экалагічных пытаннях г. Брэста, без ціску і пераследу з боку спецслужбаў;
• спыніць распачатыя адміністратыўныя працэсы ў дачыненні да затрыманых 16 студзеня грамадзянаў У. Вялічкіна і В. Казака і ўстрымацца ад падобных неагатыўных практык у будучым.

Крыніца: Патрабуем неадкладна спыніць рэпрэсіі ў дачыненні да праваабронцы ПЦ "Вясна" Уладзіміра Вялічкіна