52-гадовы жыхар Брагіна Уладзімір Церамецкі атрымаў «ліст шчасця» ў канцы снежня. Мужчына шэсць гадоў прапрацаваў юрыстам у камунгасе, пасля чаго перайшоў вартаўніком на станцыю абезжалезвання вады. Год таму яго скарацілі, і з таго часу новую занятасць знайсці не ўдалося. Засталося крыху часу, каб пацвердзіць занятасць, аднак мужчына пакуль не звяртаўся ў камісію, піша tut.by.

Складанасць, з якой сутыкнуўся Уладзімір, - адсутнасць вакансій з «больш-менш годнай зарплатай».

- Пасля скарачэння я шукаў працу і прыходзіў у мясцовае ўпраўленне. Але мне прапаноўвалі 150-200 рублёў. Вартаўніком я атрымліваў дзесьці 300 рублёў, але там працаваў суткі праз трое, - успамінае мужчына.

Уладзімір тлумачыць, што пакуль павелічэнне тарыфаў яго не датычыць - у доме няма падагрэву вады, толькі газавыя калонкі. Павышэнне закране сям'ю толькі ў кастрычніку.

Мужчына напісаў два лісты 29 снежня ў Брагінскі райвыканкам і Гомельскі аблвыканкам, але «адказу яшчэ не было». У зваротах ён просіць выключыць яго з базы дармаедаў, а таксама патрабуе праверыць дэкрэт на канстытуцыйнасць з-за «прымусу да працы". Акрамя гэтага Уладзіміра хвалюе, што яго дадзеныя патрапяць у агульнадаступную базу, якой змогуць скарыстацца розныя дзяржорганы.

Пакуль ёсць шанец, што ўдасца даказаць сваю «занятасць у эканоміцы»: у мужчыны ў 20 км ад Брагіна ёсць дом, які застаўся ад маці, і 50 гектараў зямлі. Зараз Уладзімір там трымае гаспадарку: сочыць за агародам і падкормлівае курэй. Паколькі ў горадзе няма працы, ён ездзіць на дачу практычна кожны дзень. Зараз адзіны сямейны даход - зарплата жонкі, якая працуе загадчыцай аптэкі. Жанчына атрымлівае прыкладна 800-900 рублёў у месяц.

У сям'і ёсць сын, які другі год навучаецца ў Польшчы. Уладзімір мяркуе, што яму таксама можа прыйсці апавяшчэнне.

Крыніца: Жыхар Брагіна запатрабаваў праверыць «дармаедскі» дэкрэт на канстытуцыйнасць