Супрацоўнікі Аршанскага ГУБАЗіКа праводзяць 30 жніўня ператрус па месцы пражывання футбольнага заўзятара Аляксея Сукорскага, якога судзяць за надпіс экстрэмісцкага зместу на галаўным уборы.

Як паведамляе прадстаўнік Праваабарончага цэнтра "Вясна" ў Оршы Ігар Казмерчак, пасля судовага пасяджэння да яго падыйшлі супрацоўнікі міліцыі і прапанавалі прайсці ў аддзяленні міліцыі, каб разабрацца з раней канфіскаваным тэлефонам фаната. Калі той пагадзіўся, яго затрымалі і павезлі на ператрус. Нагадаем, што 28 жніўня ў судзе Аршанскага раёну і Оршы распачаўся працэс, на якім вызначыцца, ці мелі нашыўкі на затрыманым міліцыяй 19-гадовым Аляксею Сукорскім экстрэмісцкі змест.

У першы дзень закрытага судовага працэсу судзьдзя Натальля Байцова апытала супрацоўніка Ўпраўленьня па барацьбе з арганізаванай злачыннасьцю і карупцыяй Івана Мірановіча, а таксама Аляксея Сукорскага, у якога міліцыянты канфіскавалі нашыўкі з абрэвіятурамі «A.C.A.B.» і «С.Л.О.Н.». Суд мае вызначыцца, ці маюць яны экстрэмісцкі зьмест.

Як паведамляла “Віцебская Вясна” , супрацоўнікі ўпраўлення па барацьбе з арганізаванай злачыннасцю і карупцыяй накіравалі абедзве абрэвіятуры на экспертызу. У якасці экспэрта быў абраны дырэктар Віцебскага філіяла Міжнароднага ўніверсітэта МІТСО, кандыдат гістарычных навук Аляксандар Дзядзінкін. Паводле ягоных высноваў, згаданыя абрэвіятуры маюць змест, накіраваны на распальванне варожасці па сацыяльнай прыкмеце. У прыватнасці, варожасць «прадстаўнікоў моладзевых альтэрнатыўных субкультур супраць супрацоўнікаў праваахоўных органаў».

30 жніўня на працэс быў выкліканы Аляксандар Дзядзінкін, які патлумачыў, што спалучэнне літар «A.C.A.B.» і «С.Л.О.Н.» носіць экстрэмісцкі характар.

Аляксею Сукорскаму пагражае крымінальная справа паводле артыкулу 130 Крымінальнага кодэксу «Распальванне расавай, нацыянальнай або рэлігійнай варожасці». Падчас затрымання міліцыянты забралі ў яго тэлефон і шукаюць у ім цяпер матэрыялы экстрэмісцкага зместу, а па мецы жыхарства праводзяць ператрус.

Крыніца: У аршанскага заўзятара, якога судзяць за экстрэмізм, адбываецца ператрус