11.11.2024 Тэгі: палітвязні, ЕС-Беларусь, заявы, салідарнасць Асобы: Алесь Бяляцкі
Камітэт Палаты дэпутатаў па замежных справах у прынятай 7 лістапада рэзалюцыі заклікаў рэжым Лукашэнкі неадкладна і безумоўна вызваліць лаўрэата Нобелеўскай прэміі міру і прэміі Вацлава Гавела Алеся Бяляцкага. Таксама Камітэт выступіў за вызваленне яшчэ амаль 1300 палітычных зняволеных, спыненне палітычных рэпрэсій у Беларусі і пераследу дэмакратычна настроеных апанентаў рэжыму ў выгнанні.
Член Камітэта Хаята Акамура, які рыхтаваў рэзалюцыю, параўнаў зняволенага кіраўніка "Вясны" з былым чэшскім дэсідэнтам і прэзідэнтам Чэхіі Вацлавам Гавелам:
"Гэты літаратуразнаўца сядзіць у турме ўжо больш за тры гады. Гэта зусім нечувана і абуральна, што беларуская дыктатура адважылася такім чынам пасадзіць у турму лаўрэата Нобелеўскай прэміі міру".
Ён высока ацаніў той факт, што ў рэшце рэшт усе дэпутаты, якія прысутнічалі на пасяджэнні як Падкамітэту па дэмакратыі і правах чалавека за мяжой, так і праз некалькі дзён Камітэта па замежных справах, выказалі сваю падтрымку несправядліва зняволеным у Беларусі і прынялі адпаведную рэзалюцыю.
Асобна ў дакуменце падкрэсліваецца, што "правядзенне прэзідэнцкіх выбараў, якія былі прызначаныя на 26 студзеня 2025 года ў Рэспубліцы Беларусь у цяперашніх умовах, калі кандыдаты ад папярэдніх прэзідэнцкіх выбараў па-ранейшаму несправядліва знаходзяцца ў зняволенні, з'яўляюцца непрымальнымі, а іх вынікі не могуць лічыцца легітымнымі".