17.09.2024 Тэгі: крымінальны пераслед, палітвязні У Ленінскім судзе Брэста 16 верасня 2024 года суддзя Андрэй Грушко вынес прысуд па крымінальнай справе Генадзя Васілюка, Ганны Васілюк, Дзяніса Андрашука, Мікалая Пратасевіча і Рамана Парфёнава. Усіх абвінавачвалі паводле ч. 1 арт. 342 (групавое парушэнне грамадскага парадку).

Як піша "Берасцейская вясна", іх прызналі вінаватымі і прысудзілі

Ганне Васілюк - год калоніі ва ўмовах агульнага рэжыму;

Дзянісу Андрашуку - адзін год і шэсць месяцаў калоніі;

Мікалаю Пратасевічу - адзін год і шэсць месяцаў калоніі;

Раману Парфёнаву - адзін год і шэсць месяцаў калоніі.

Як вынікае з прэс-рэлізу суда,  палітвязень Генадзь Васілюк атрымаў таксама паўтара года калоніі, але з улікам неадбытага папярэдняга пакарання яму канчаткова прызначана два гады калоніі агульнага рэжыму.

Паводле паведамлення суда, сутнасць абвінавачвання супраць усіх палягала ў тым, што людзі 10 жніўня 2020 года ў Берасці яны "выкрыквалі лозунгі, свісталі, пляскалі ў далоні, дэманстравалі палотны бел-чырвона-белага колеру, выходзілі на праезную частку". Гэтым яны нібыта груба парушалі грамадскі парадак.

57-гадовы Васілюк Генадзь у дадзены момант ужо прызнаны палітвязнем: у лютым 2024 года яму прысудзілі паўтара года калоніі з-за трох «класаў» у «Аднакласніках» (у вачах абвінавачвання гэта ператварылася ў «распаўсюд паклёпу на Лукашэнку»).

Такім чынам, ужо вядома пра 53 асуджаных паводле артыкула 342 КК за Берасцейскія пратэсты, якія праходзілі 10 жніўня 2020 года. Па такім артыкуле за пратэсты таго дня судзяць з фармулёўкамі» выкрыквалі лозунгі, дэманстравалі палотны бел-чырвона-белага колеру, выходзілі на праезную частку " — гэта значыць людзей судзяць за рэалізацыю права на мірны пратэст.

Крыніца: Палітвязня Генадзя Васілюка ізноў асудзілі да калоніі. А таксама яго жонку, і яшчэ траіх чалавек