08.12.2023 Тэгі: пераслед, ціск, рэпрэсіі, экстрэмізм У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць "экстрэмісцкімі" матэрыяламі і фармаваннямі. Праваабарончы цэнтр "Вясна" 7-8 снежня збірае факты палітычнага пераследу беларусаў і беларусак – інфармацыя ўвесь час дапаўняецца.

Палітзняволеных праваабаронцаў "Вясны" ўнеслі ў "спіс экстрэмістаў"

Палітзняволеныя вясноўцы Валянцін Стэфановіч, Алесь Бяляцкі, Уладзімір Лабковіч

8 снежня МУС зрабіла традыцыйны пятнічны апдэйт "Пераліка грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці".

Сярод іншых, у спіс дадалі старшыню "Вясны" і Нобелеўскага лаўрэата Алеся Бяляцкага, яго намесніка і віцэ-прэзідэнта FIDH Валянціна Стэфановіча, каардынатара кампаніі «Праваабаронцы за свабодныя выбары» Уладзіміра Лабковіча, праваабаронцу Дзмітрыя Салаўёва.

У "Спісе экстрэмістаў" з'явілася прозвішча памілаванага Рамана Пратасевіча  — побач з ім пазнака "судзімасць не пагашана"

Таксама 8 снежня ў спіс дадалі Сцяпана Пуцілу і Яна Рудзіка, якіх судзілі "завочна" разам з Пратасевічам. Нагадаем, у траўні суддзя Вячаслаў Тулейка прысудзіў Сцяпану — 20 гадоў, Яну — 19 гадоў, Раману — 8 гадоў. Пазней Пратасевіч быў памілаваны Лукашэнкам.

Суд Чыгуначнага раёна Гомеля за адно пасяджэнне прызнаў "экстрэмісцкімі" 89 старонак у інтэрнеце

Згодна з Рэспубліканскім Спісам экстрэмісцкіх матэрыялаў, 4 снежня ў судзе Чыгуначнага раёна Гомеля за адно пасяджэнне былі прызнаныя "экстрэмісцкімі" 89 інтэрнет-старонак. Гаворка пра розныя сайты, TikTok-акаўнты, Instagram-старонкі, Telegram-чаты, старонкі ў "Аднакласніках" і Youtube-каналы.

Агульны спіс тых, каго ў судзе Чыгуначнага раёна Гомеля за дзень прызналі экстрэмісцкімі, займае 13 старонак.

У Беларусі прызнаная "экстрэмісцкай" чарговая кніга

Кніга "Горкія гады: Трагедыя Заходняй Беларусі 1944-1954" Аляксандра Татаранкі

Гэта "Горкія гады: Трагедыя Заходняй Беларусі 1944-1954" Аляксандра Татаранкі. Адпаведнае рашэнне прынятае судом Баранавіцкага раёну і Баранавічаў 6 снежня.

Агулам "экстрэмісцкі" спіс папоўнілі дзясяткі пазіцый, сярод якіх Telegram-каналы "Асацыяцыя беларусаў у Амэрыцы" і "Прадстаўніцтва па замежных справах", а таксама сайт pozirk.оnline.

У Светлагорску адбыліся затрыманні былых супрацоўнікаў тэлеканалу "Ранак"

На сваёй старонцы ў Facebook Андрэй Ліпскі, адзін з былых супрацоўнікаў каналу, паведаміў, што 7 снежня зноў прайшла хваля допытаў і затрыманняў яго калегаў.

Дагэтуль не выходзяць на сувязь Людміла Андэнка (карэспандэнтка) і Юлія Даўлетава (былая галоўная рэдактарка), таксама няма сувязі з дырэктаркай Аленай Шчэрбін.

Стала вядома, што дваіх жанчын затрымалі ў межах крымінальнай справы па арт. 361-1 КК (садзейнічанне экстрэмісцкай дзейнасці). Зараз яны знаходзяцца ў ІЧУ Жлобіна, паведаміла "Гомельская вясна".

Суд у Дуброўне арыштаваў на суткі трактарыста з-за падпіскі ў "Аднакласніках" на мясцовы паблік

Сяргей Каўбасаў

Бацька чатырох дзяцей Сяргей Каўбасаў жыве з сям'ёй у аграгарадку Расасна Дубровенскага раёна, працуе ў ААТ "Баброва-Агра" трактарыстам, паведаміў 7 снежня тэлеграм-канал "Витебск, я гуляю!".

Сілавікі знайшлі ў яго ў "Аднакласніках" падпіску на суполку "Усё аб Дуброўна", якая два месяцы таму была прызнана "экстрэмісцкай".

У выніку суддзя Ігар Татаеў арыштаваў мужчыну на адны суткі.

ГУБАЗіК затрымаў кіраўніка загараднага клуба "Фестывальны"

Генадзь Верамейчык

На "пакаяльным" відэа" 7 снежня затрыманы сцвярджае, што ўдзельнічаў у паслявыбарчых акцыях пратэсту, а ў 2020-ым годзе зняў з тэрыторыі клуба чырвона-зялёны сцяг.

Загарадны клуб "Фестывальны" з'яўляецца адной з найбуйнейшых пляцовак на рынку еvent-паслуг Беларусі. Ён спецыялізуецца на правядзенні карпаратыўных мерапрыемстваў (забаўляльных і навучальных) і прыватных святаў.

Паводле інфармацыі "Медыязоны", затрыманы — Генадзь Верамейчык.

70-гадоваму святару з Валожына прад'явілі абвінавачванне — ён застаецца за кратамі

Генрых Акалатовіч

6 снежня мінула 20 дзён з часу затрымання пробашча рыма-каталіцкай парафіі Святога Юзафа ў Валожыне ксяндза Генрыха Акалатовіча. За гэты час яму павінны былі альбо прад'явіць абвінавачванне ў крымінальным злачынстве, альбо выпусціць на волю.

Як стала вядома Katolik.life ад кампетэнтных крыніц, святару абраная мера ўтрымання ў выглядзе заключэння пад варту і ён застаецца за кратамі – гэта азначае, што яму прад'явілі абвінавачванне. Да змены статусу для яго адмаўляліся прымаць цёплыя рэчы і прадукты. У першыя дні пасля затрымання святару ўдалося перадаць толькі прадметы гігіены, бялізну і таблеткі – ён пераносіць сур'ёзныя хваробы, таму вымушаны прымаць некалькі відаў лекаў.

Сілавікі затрымалі жыхара Гродна

"Пакаяльнае" відэа з затрыманым з'явілася 7 снежня ў праўладным тэлеграм-канале. Мужчына нібыта прайшоў рэгістрацыю ў чат-боце "плана Перамога", а таксама распаўсюджваў "экстрэмісцкія матэрыялы".

ГУБАЗіК затрымаў дырэктара аўтадому Mercedes‑Benz

Сяргей Даніловіч

Пра затрыманне стала вядома 7 снежня.

Праўладныя тэлеграм-каналы сцвярджаюць, што дырэктар аўтацэнтра "Энергія ГмбХ" нібыта ўдзельнічаў у акцыях пратэсту і пералічваў грошы ў "Фонд Салідарнасці". Таксама на відэа мужчыну прымушаюць назваць свой заробак.

Паводле інфармацыі з адкрытых крыніц, дырэктарам аўтацэнтра "Энергія ГмбХ" з'яўляецца Сяргей Даніловіч.

Крыніца: Палітзняволеныя вясноўцы ў "спісе экстрэмістаў": хроніка пераследу 7-8 снежня