29.11.2023 Тэгі: крымінальны пераслед, грамадства, палітвязні, пераслед, затрыманні У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць "экстрэмісцкімі" матэрыяламі і фармаваннямі. Праваабарончы цэнтр "Вясна" 29 лістапада збірае факты палітычнага пераследу беларусаў і беларусак – інфармацыя ўвесь час дапаўняецца.

На палітзняволеную Таццяны Канеўскай працягваецца аказвацца ціск

Па інфармацыі праваабаронцаў, Таццяна Канеўская пазбаўленна спатканняў, а за год ёй дазволена толькі адна маленькая бандэроль. Лісты ад яе даходзяць рэдка. У турме яе будуць утрымліваць да сакавіка, а потым мусяць перавесці ў гомельскую калонію.

Нагадаем, у калоніі Таццяну змяшчалі ў ШІЗА і ў ПКТ. У студзені 2022 Таццяне ўзмацнілі пакаранне і перавялі на турэмны рэжым.

Таццяна — актывістка ініцыятывы “Матчын рух 328”. Змагалася за свабоду свайго сына, якога асудзілі па наркатычным артыкуле. У траўні 2021 года яе асудзілі да 6 гадоў калоніі па двух артыкулах Крымінальнага кодэкса: ч. 2 арт. 293 (удзел у масавых беспарадках) і арт. 292 (захоп будынкаў).

Ініцыятыва «Dissidentby» прызнаная «экстрэмісцкім фармаваннем»

Адпаведнае рашэнне прынятае МУС 29 лістапада.

Сілавікі затрымалі індывідуальнага прадпрымальніка з Гродна

На «пакаяльным відэа» мужчына «прызнаецца» ў рэгістрацыі ў чат-боце плана «Перамога», а таксама ў тым, што ён нібыта пісаў абразлівыя каментары пра супрацоўнікаў Міністэрства абароны.

Распачалі крымінальную справу супраць заснавальніцы «Саюза Маці Беларусі» і яе мужа

Баранавіцкая пракуратура распачала крымінальныя справы па фактах стварэння і кіраўніцтва экстрэмісцкім фармаваннем, публічнай абразы Лукашэнкі і паклёпу на яго, а таксама садзейнічання экстрэмісцкай дзейнасці.

Згодна з матэрыяламі справы, 60-гадовая заснавальніца «Саюза Маці Беларусі» стварыла і кіравала «экстрэмісцкім фармаваннем». На адным з рэсурсаў яна размясціла відэазапіс, «у якім утрымліваўся паклёп у дачыненні да Лукашэнкі, у тым ліку абвінавачванні ў здзяйсненні цяжкага злачынства».

Паведамляецца, што муж падазраванай даў інтэрв'ю для «экстрэмісцкага фармавання» і ў сацсетках размясціў абразы на адрас Лукашэнкі.

Сужэнцы знаходзяцца за мяжой.

КДБ прызнаў «Саюз Маці Беларусі» «экстрэмісцкім фармаваннем» 29 верасня. Ведамства таксама назвала імёны людзей, якія, як мяркуецца, звязаныя з арганізацыяй: Анцілеўская Святлана, Здановіч Вольга, Якавенка (Ліфанава) Таісія, Алесінская Наталля, Тарпанава (Васільцова) Таццяна.

Крыніца: Ціск на палітзняволеную, "Dissidentby" — "экстрэмісцкае фармаванне": хроніка пераследу 29 лістапада