16.08.2023 Тэгі: суды, крымінальны пераслед 
У судзе Ленінскага раёна Мінска 18 ліпеня быў вынесены прысуд 41-гадоваму Віталю Станішэўскаму, абвінавачанаму ва ўдзеле ў паслявыбарчых акцыях пратэсту ў Мінску ў 2020 годзе (ч. 1 арт. 342 Крымінальнага кодэкса).
Справу разглядала суддзя Юлія Шчоткіна.
Па матэрыялах абвінавачання, Станішэўскі ў адзін з вераснёскіх дзён прыехаў у гандлёвы цэнтр “Карона”. Убачыўшы шмат людзей з сімволікай далучыўся да іх, “разам з неўстаноўленнымі асобамі парушаў грамадскі парадак, непадпарадкоўваўся патрабаванням супрацоўнікам міліцыі, выходзіў на праезную частку вуліц, выкрыкваў лозунгі і замінаў працы грамадскага транспарту... Затым, стоячы на праезнай частцы паміж галоўпаштамтам і гасцініцай “Мінск” сфатаграфаваўся на свой тэлефон".
У судзе Станішэўскі свае раней паказанні не пацвердзіў і паказаў, што сапраўды падпісаў падчас следства ўсе працэсуальныя дакументы, якія ёсць у справе, у тым ліку яўку з павіннай, паколькі невядомая асоба прысылала на тэлефон паведамленні, пагражала паведаміць у праваахоўныя органы аб здзейсненым ім злачынстве. А фотаздымак, маўляў, быў зроблены на тратуары.
Суд таксама выключыў з абвінавачвання ўказанне аб прычыненні “Мінскаўтатрансу” матэрыяльнай шкоды на суму 5 839 рублёў 65 капеек.
Віталю Станішэўскаму суд прызначыў абмежаванне волі без накіравання ва ўстанову адкрытага тыпу тэрмінам на адзін год і шэсць месяцаў.
Ягонае прозвішча ўнесенае ў спіс “Асоб, датычных да экстрэмісцкай дзейнасці”.