21.04.2023 Тэгі: суды, крымінальны пераслед У Магілёўскім абласным судзе па справе "Чорнай кнігі Беларусі" да шасці гадоў калоніі ва ўмовах узмоцненага рэжыму асудзілі 27-гадовага былога ўчастковага Алега Зубовіча. Яго абвінавацілі паводле ч. 3 арт. 130 (распальванне іншай сацыяльнай варожасці) і ч. 3 арт. 203-1 (незаконныя дзеянні ў адносінах інфармацыі да прыватнага жыцця) Крымінальнага кодэкса. Суддзя Дзмітрый Крэнжыеўскі вынес прысуд 29 снежня 2022 года, але вынік стаў вядомы праваабаронцам толькі цяпер. Пры затрыманні былога міліцыянта моцна збілі. Мужчыну ўжо накіравалі ў калонію адбываць тэрмін. 

Алег Зубовіч

Алег працаваў участковым да кастрычніка 2019-га года. На момант затрымання ён працаваў ахоўнікам. 

Паведамляецца, што пры затрыманні хлопец быў моцна збіты. Суд праходзіў у Магілёўскім абласным судзе. Пацярпелымі па справе выступалі яго былыя калегі, якія спагналі з яго маральную кампенсацыю.

Прысуд уступіў у сілу ў сярэдзіне красавіка, тады ж Камітэт дзяржаўнай бяспекі дадаў яго ў спіс "асоб, якія маюць дачыненне да тэрарыстычнай дзейнасці".

Падтрымайце Алега паштоўкамі і лістамі (пажадана, заказнымі): ПК №3, 211300, п. Віцьба, Віцебская вобл, Віцебскі раён, Алег Ігаравіч Зубовіч

Крыніца: Былога ўчастковага асудзілі да 6 гадоў калоніі па справе "Чорнай кнігі Беларусі"