Пры рэгістрацыі кандыдатаў у дэпутаты Смаргонскага раённага Савета было праведзена лёсаванне часу запісу выступаў кандыдатаў і выхаду запісаў ў эфір. Згодна з гэтым рашэннем запіс мусіў адбывацца ў Смаргоні, паведамляе "Гарадзенская Вясна".

Але затым Гарадзенская абласная камісія прыняла рашэнне, паводле якога запісы са Смаргоні пераносяцца у Гародню, дзе запіс зробіць «Тэлерадыёкампанія «Гродно».

Абласная выбарчая камісія патлумачыла свае дзеянні тым, што час эфіру «Смаргонскага радыё» - гэта аўторак, пятніца з 11.40 да 12.00, што не адпавядае патрабаванням Пастановы ЦВК № 46, паводле якой запіс мусіць транслявацца ў 18.00.

Але ж калі час трансляцыі ў Смаргоні не супадае з часам трансляцыі гарадзенскага тэлерадыёцэнтра, то гэта не перашкаджае зрабіць запіс у Смаргоні, з наступнай перадачай яго ў Гародню для трансляцыі.

З такім тлумачэннем і патрабаваннем правесці запіс у райцэнтры кандыдат у дэпутаты Алесь Дзергачоў звярнуўся ў выбарчую камісію. У адказ яна прапанавала Дзергачову за кошт уласнага перадвыбарчага фонду паехаць на запіс у Гародню.

На падставе гэтага адказу Алесь Дзергачоў звярнуўся у ЦВК з патрабаваннем усё ж такі арганізаваць запіс радыёвыступу ў Смаргоні. Пры гэтым пазначыў, што сродкі перадвыбарчага фонду у яго цалкам вычарпаны, а таму ён не мае магчымасці прыехаць на запіс у абласны цэнтр.

У сваім звароце кандыдат таксама звярнуў увагу на тое, што пастанова аб пераносе запісу выступаў у Гародню носіць закрыты характар, яна не размешчана ў адпаведным раздзеле сайта аблвыканкам. Само лёсаванне выступаў кандыдатаў было праведзена раённай камісіяй адпаведна Выбарчаму кодэксу. Аднак на паседжанне па адмене папярэдняга рашэння пра час і месца запісу Дзергачоў як кандыдат не запрашаўся.

ЦВК аргументы кандыдата цалкам праігнаравала. У адказе на яго зварот паведамляецца, што радыёвяшчальны СМІ забяспечвае падрыхтоўку перадачы з выступамі кандыдатаў у дэпутаты і гэтым СМІ з’яўляецца менавіта “Тэлерадыёкампанія “Гродно”. Яна запісвае выступы ўсіх кандыдатаў у дэпутаты Смаргонскага райсавета, і гэта мусіць адбывацца толькі на сваёй студыі ў Гародні. Забяспечыць магчымасць запісу ў Смаргоні ў тэлерадыёкампаніі няма.

Чаму немагчыма запісаць выступ ў Смаргоні, дзе ёсць адпаведныя спецыялісты, у адказе не паведамляецца.

"Праваабаронцы за свабодныя выбары"

Крыніца: ЦВК ухілілася ад абароны права кандыдата на радыёвыступ