Мінскі абласны суд у закрытым пасяджэнні вынес абвінаваўчы прысуд жыхару Маладэчна Сяргею Алексееўскаму, абвінавачанаму ў распальванні сацыяльнай варожасці (ч.1 арт 130) і абразе прэзідэнта і прадстаўнікоў улады.
Справу разглядала суддзя Алена Міснік.
Алексееўскага затрымалі 1 кастрычніка 2021 года і да суда ўтрымлівалі ў следчай турме №8 Жодзіна.
Па матэрыялах абвінавачання, палітзняволены Сяргей Алексееўскі, з чэрвеня 2020 года па верасень 2021 года з дапамогай электронных прылад “размясціў у розных агульнадаступных групах сацыяльнай сеткі "Вконтакте" каментары, накіраваныя на стварэнне ў аўдыторыі ілжывага ўяўлення аб нелегітымнасці дзеянняў праваахоўнага блока пры выкананні службовых абавязкаў, Узбуджэнне нянавісці, сацыяльнай варожасці і варожасці па прыкмеце прыналежнасці да прафесіі".
Ён жа ў названай сацыяльнай сетцы публічна абразіў Прэзідэнта Рэспублікі Беларусь і іншых прадстаўнікоў улады. Усе гэтыя каментары былі пакінутыя пасля гібелі ў менскай кватэры супрацоўніка КДБ Дзмітрыя Федасюка і it-спецыяліста Андрэя Зэльцэра.
Падчас папярэдняга следства і ў судовым пасяджэнні Алексееўскі вінаватым сябе не прызнаў.
Аднак, з улікам прадстаўленых дзяржаўным абвінаваўцам доказаў судовая калегія па крымінальных справах Мінскага абласнога суда 13 ліпенят пастанавіла абвінаваўчы прысуд. На падставе ч. 1 арт. 368, ч. 1 арт. 130, арт. 369 Крымінальнага кодэкса Рэспублікі Беларусь жыхару Маладэчна па сукупнасці злачынстваў прызначана канчатковае пакаранне ў выглядзе пазбаўлення волі на тэрмін тры гады ў калоніі агульнага рэжыму са штрафам у памеры 100 базавых велічынь.
20 чэрвеня 2022 г. КДБ унёс Сяргея ў спіс "асоб, якія маюць дачыненне да тэрарыстычнай дзейнасці".